නමො තස්‌ස භගවතො අරහතො සම්‌මාසම්‌බුද්‌ධස්‌ස
මහාදයො යො හදයො’දයො’දයො
හිතාය දුක්‌ඛානුභවෙ භවෙ භවෙ,
අකාසි සම්‌බොධිපදං පදං පදං
තමාභිවන්‌දාමි ජිනං ජිනං ජිනං; (යමකබන්‌ධනං)
පහාය යත්‌ථා’භිරතිං රතිං රතිං
රමන්‌ති ධම්‌මෙව මුනී මුනී මුනී,
විමුත්‌තිදං සබ්‌බභවා භවා’භවා
තමාභිවන්‌දෙ මහිතං හිතං හිතං; (යමකබන්‌ධනං)
නිපීතසද්‌ධම්‌මරසා රසා’රසා
සුපුඤ්‌ඤඛෙත්‌තො’රසතං සතං සතං,
ගතා විධූතා විනයෙන යෙන යෙ
තමාභිවන්‌දෙ’සිගණඞ්‌ගණ’ඞ්‌ගණං; (යමකබන්‌ධනං)
ජිනා’නතම්‌භොරුහ හංසරාජිනී
ජිනොරසානං මුඛපඤ්‌ජරා’ලි නී,
සදත්‌ථසාරං සරසං විසූද නී
උපෙතු මෙ මානසමෙව වාණි නී;
කම්‌මාවසෙසා විචිතො’පජාත්‍යා
ගන්‌ථා’හිසඞ්‌ඛාරවිබන්‌ධකා මෙ,
ගන්‌ථා’හිසඞ්‌ඛාරවිබන්‌ධකා මෙ,
පණාම පුඤ්‌ඤාතිසයෙන’නෙන
මා පාකදානා’වසරා භවන්‌තු;
සුවණ්‌ණවණ්‌ණස්‌ස ජිනස්‌ස වණ්‌ණං
වණ්‌ණෙය්‍ය කපක්‌පම්‌පි කජිතො සුවණ්‌ණො,
කප්‌පස්‌සි’වොසාන මනත්‌තතාය
න පාපුණෙ බුද්‌ධගුණාන මන්‌තං;
නිද්‌ධන්‌ත චාමීකර චාරු රූපං
සරස්‌සතී භූසණ භාසනංච,
අනඤ්‌ඤ සාධාරණ ඤාණමස්‌ස
අවාවියා’චින්‌තිය මපක්‌පමෙය්‍යං;
කුහිං අසාධාරණ රූප ලීලා
කුහිං අසාධාරණ වාණි ලීලා,
කුහිං අසාධාරණඤාණ ලීලා
කුහිං නු මෙ මන්‌දමතිස්‌ස ලීලා;
විභාවිමානී පරවම්‌හිනො යෙ
ඉස්‌සා’භිමානෙන විභඤ්‌ඤමානා,
ගවෙසයන්‌තී’ධ පරස්‌ස රව්‌ධං
තෙසං පසංසාගරහාහි කිම්‌මෙ;
පසත්‌ථ සත්‌ථාගම පාරදස්‌සී
යෙ සාධවො සාධු ගුණප්‌පසන්‌තා,
ගන්‌ථස්‌ස නිම්‌මාණපරිස්‌සමං නො
ජානන්‌ති තෙයෙව ඉධප්‌පමාණා;
ආදිච්‌චවංසප්‌පභවස්‌ස තස්‌ස
ජිනස්‌ස සත්‌ථාගමකොවිදෙහි,
වුත්‌තොපි පුබ්‌බාචරියෙහි යෙසු
ගන්‌ථෙසු සඞ්‌ඛෙපවසෙන වංසො;
න තෙහි සක්‌කා සුගතස්‌ස වංසං
කිඤ්‌චාපි විඤ්‌ඤාතු මසෙසයිත්‌වා,
සම්‌පුණ්‌ණවංසස්‌ස විභාවනාය
තස්‌මා සමුස්‌සාහිත මානසෙන;
අභිප්‌පසන්‌නො රතනත්‌තයම්‌හි
පසත්‌ථවංසප්‌පභවො පභුනං,
විභුසණො විස්‌සුතකිත්‌තිඝොසො
යො භාති ලඞ්‌කාය මුළාරභාග්‍යො;
අමන්‌දචාගා’භිරතස්‌ස
පුනන්‌දු නාමස්‌ස දයාධනස්‌ස,
බුද්‌ධෙ පසාදාතිසයස්‌ස තස්‌ස
අජ්‌ඣෙසනඤ්‌චාපි පටිග්‌ගහෙත්‌වා;
නස්‌සාය පුබ්‌බාචරියො’පදෙසං
සොතූන මත්‌ථාය මයා හිතාය,
නිරුත්‌තියා මාගධිකාය සම්‌මා
විධීයතෙ’දං ජිනවංසදීපං;
සද්‌ධාසිනෙහානුගතාය පඤ්‌ඤා-
දසාය සොතූහි මනොවිමානෙ,
පදීපිතො’යං ජිනවංසදීප-
දීපොහරෙපාපතමප්‌පබන්‌ධං;
පුරඞ්‌ගපුණ්‌ණා සිරිජම්‌බුදීපෙ
සම්‌පත්‌තිභාරෙන දිවා’වතිණ්‌ණා,
යා දෙවරාජස්‌ස’මරාවතී’වා-
මරාවතීනාම පුරී පුරෙ’සී;
විජ්‌ජාධරානඤ්‌ච විහඞ්‌ගමානං
විබන්‌ධ වෙහාසගතිං බහාස,
යස්‌මිං පුරස්‌මිං ජිතවෙරි චක්‌කං
පාකාරචක්‌කං විය චක්‌කවාළං;
සඤ්‌චුම්‌බිතම්‌හොජ රජො පබන්‌ධ-
සුපිඤ්‌ජරාපා පරිඛාහිරාමා,
පුරිත්‌ථි පාකාර නිතම්‌බභාගෙ
සමුබ්‌බහී කඤ්‌චන මෙඛලා’භං;
රත්‌තින්‌දිවා රත්‌තමණි’න්‌දනීල-
මණිප්‌පභාරඤ්‌ජිත රාජධානි,
බබන්‌ධ යා’මන්‌දසුරින්‌දචාප-
සමුජ්‌ජලාකාසතලබ්‌බිලාසං;
යහිංවධූනං වදනම්‌බුජෙහි
කතාවමානං හරිණඞ්‌කබිම්‌බං,
පභාහි නීලොපලතොරණාතං
සොකාභීභූතංච විවණ්‌ණමාප;
සරොරුහ’න්‌තී මණිමන්‌දිරාභා-
සඤ්‌චුම්‌බිතං පුණ්‌ණසසඞ්‌කබිම්‌බං;
සඞ්‌කාය රාමාජනතා’භිරාමා
කරෙ පසාරෙසි පුරම්‌හි යස්‌මිං;
යත්‌ථ’ඞ්‌ගනානං පටිබිම්‌බිතානි
ආදාසභිත්‌තීසු මුඛම්‌බුජානි,
ආසුං විඝාතාය මධුබ්‌බතානං
විලොචනාලීන මනුග්‌ගහාය;
සම්‌මත්‌ත මාතඞ්‌ග ධරාධරෙහි
යස්‌මිං අභිස්‌සන්‌ද මදස්‌සවන්‌ති,
තුරඞ්‌ග රඞ්‌ගෙහී තරඞ්‌ග මාලා
සමාකුලෙවා’සි විධූත ධූලී;
නික්‌ඛිත්‌තවීණා මණිනුපුරානං
විලාසිනීනං මුදුපාණි පාදෙ,
මත්‌තාලිමාලා කලනාදිනී කිං
නාලඞ්‌කරුං යත්‌ථ කතාවකාසා;
ධවත්‌ථිනීනං කුචසාරසෙහි
නෙත්‌තාලිභාරා’නනනීරජෙහි,
යා හාසවීචීහි පුරී රජන්‍යා
රරාජ සමඵුල්‌ලසරොජිනී’ව;
චන්‌දප්‌පභා චුම්‌බිත චන්‌දකන්‌ත
පාසාණධාරා මණිචන්‌දිකාසූ,
චන්‌දානනානං යහි මඞ්‌ගනාහං
පරිස්‌සමස්‌සො’පසමාය’හෙසුං;
යස්‌මිං පූරෙ උද්‌ධමධො විනද්‌ධ-
ජුතිප්‌පබන්‌ධො මණිමන්‌දිරානං,
සමුබ්‌බහී ගෙරුක පඞ්‌ක දිද්‌ධ-
විතාන පච්‌චත්‌ථරණබ්‌බිලාසං
සුවණ්‌ණ මුත්‌තා මණි වංසවණ්‌ණා-
පවාළ රූපී වජිරෙහිඤ්‌චා’පි,
යා සත්‌තධඤ්‌ඤෙහි ධනෙහි ඵීතා
අහූ පුරි ධඤ්‌ඤවතී’ව නාරී; (සිලෙසබන්‌ධනං)
පසාරිතා’නෙකදිසාමුඛෙසු
විචිත්‌තවත්‌ථා’භරණාදිපූරා,
යත්‌ථා’පණා නිජ්‌ජිතකප්‌පරුක්‌ඛා
කරිංසු ලොකාභිමතත්‌ථසිද්‌ධිං;
පරාගරත්‌තා මධුපාතිමත්‌තා
සම්‌හින්‌නවෙලා ඝනනීලවාලා,
හංසාසයා පඤ්‌චසරාභිරාමා
යස්‌මිං තළාකා විය කාමභොගී; (සිලෙසබන්‌ධනං)
පුරන්‌තරස්‌මිං රතනග්‌ඝිකානං
රංසිප්‌පබන්‌ධෙහි හතන්‌ධකාරෙ,
කුන්‌දාරවින්‌දබ්‌භුදයෙනයස්‌මිං
රත්‌තින්‌දිවාභෙද මවෙදි ලොකො;
මාතඞ්‌ගජීමූතඝටාය ඝණ්‌ටා-
ටඞ්‌කාරගම්‌භීරරවාය යස්‌මිං,
පලම්‌භීතා මත්‌තසිඛණ්‌ඩිමාලා
අකා විකාලෙපි අඛණ්‌ඩකීළං;
පුරම්‌හි යස්‌මිං චරණම්‌බුජෙහි
වධූජතො බන්‌ධිතනූපුරෙහි,
විකාස කොකාසන සීස බද්‌ධ
මත්‌තාලි සෙස’ම්‌බුජිනී අජෙසි;
රසාතලං නාගඵණාවනද්‌ධං
නභොතලං විජ්‌ජුලතාවනද්‌ධං,
යා ඡාදිතා රූපියජාතරූප-
ධජාවලීහා’ජිනි රාජධානී;
නානත්‌ථසාරං මිතධාතුවණ්‌ණං
ඡන්‌දාරහං පාණගණා’භිරාමං,
කවිප්‌පසත්‌ථං සරසං සිලෙසා-
ලඞ්‌කාරපජ්‌ජං’ව පුරං යමාසි; (සිලෙසබන්‌ධනං)
පුරම්‌හි තස්‌මිං කරුණානිධානො
බුද්‌ධඞ්‌කුරො බ්‍රාහ්‌මණසාරවංසෙ,
අසඞ්‌ඛකප්‌පාන මිතො චතුන්‌නං
ලක්‌ඛාදිකානං උදපාදි පුබ්‌බෙ;
භොවාදිවංසෙ’කදිවාකරස්‌ස
පුඤ්‌ඤානුභාවො’දයමඞ්‌ගලෙහි,
ජාතස්‌ස ඛො සම්‌පති ජම්‌බුදීපො
විලුම්‌පයී මඞ්‌ගලවාසලීලං;
ජාතක්‌ඛණෙ තස්‌ස සරීරජෙන
ගන්‌ධෙන වණ්‌ණෙන සකෙ නිකෙතෙ,
හතප්‌පභා චන්‌දනතෙලදීපා
සණ්‌ඨානමත්‌තෙහි විජානියාසුං;
විමුත්‌තදොසාහි සුඛෙධිතාහි
ධාතීහි කුම්‌භොරුපයොධරාහි,
භතො කුමාරො සුකුමාරකායො
ඛෙපෙසි සො කානිචි වාසරානි;
මහාමහෙචා’ථ පවත්‌තමානෙ
සවෙද වෙදඞක්‌ග විදූ විදූහි,
කාරාපයුං තෙ පිතරො’රසස්‌ස
නාමං සුමෙධො’ති පදත්‌ථසාරං;
උළාරභාග්‍යෙන සමං කුමාරෙ
සංවද්‌ධමානෙ ජනනී න තිත්‌තිං,
පායාසි නීලාමකලලොචනාලිං
මුඛම්‌බුජං තස්‌ස’භිචුම්‌බමානා;
සුඛෙධිත’ඞ්‌ගාවයවො කුමාරො
විමානභුම්‍යා මණිනිම්‌මිතාය,
පරොදි මාතාපිතරො’භියාචං
බිම්‌බං කනිජං ජානුයුගෙන ගච්‌ඡං;
සුවණ්‌ණබිම්‌බො’පමචාරුරූපො
සමාචරං ධාතිභුජා’වලම්‌බං,
විඤ්‌ඤාසපාද’ඞ්‌ගුලිමඤ්‌ජරීහි
සලීලමාවාසමලඞ්‌කරිත්‌ථ;
නිජෙන තෙජෙන ච ජිවලොකං
යසෙන’පුබ්‌බාචරිමං ඵුසන්‌තො,
තිරොකරිත්‌වා රවිචන්‌දසොභං
සංවඩ්‌ඪි ධීරො උභතො සුජතො;
සො සත්‌තමා යාව පිතාමහස්‌ස
යුගා සගබ්‌භාසයසුද්‌ධිකො’සි,
නිහීනජච්‌චො’ති න ජාතිවාදා
ඛිත්‌තො’පකුට්‌ඨො භවි විප්‌පසෙට්‌ඨො;
වෙදන්‌තයං සො සනිඝණ්‌ටු සත්‌ථං
සකෙටුභං සාක්‌ඛරභෙද සත්‌ථං,
සාධබ්‌බතබ්‌බෙදි’තිහාස සත්‌ථං
අවෙදි වෙදඞ්‌ගයුතං ප සත්‌ථං;
අජ්‌ඣායකො මන්‌තධරො පවීණො
කලාසු ලොකායතලක්‌ඛණෙසු,
පපූරකාරි පදකො කවීනං
තෙතා’සි වෙය්‍යාකරණො ගණිසො;
කන්‌දප්‌පදප්‌පා’නලධුමරාජි-
ලීලාවලම්‌බි නිජමස්‌සුරාජි,
න කෙවලං කොමලගණ්‌ඩභාගං
මනම්‌පි ථීනං මලිනීකරිත්‌ථ;
තන්‌දෙභවණ්‌ණායතන’ණ්‌ණවම්‌හි
නරූපතණ්‌හාතරණි නරානං,
පායාසි චක්‌ඛායතනප්‌පියාහි
තීරන්‌තරං චිත්‌තනියාමකට්‌ඨා;
ද්‌විජො සුමෙධො සුවිසුද්‌ධමෙධො
මාතාපිතුන්‌නං නිධනාවසානෙ,
පුඤ්‌ඤානුභාවප්‌පභවං අගාර-
මජ්‌ඣාවසං කාමසුඛං’නුභුඤ්‌ජී;
නිසජ්‌ජ පාසාදතලෙ’කදා සො
පල්‌ලඞ්‌කමාධාය රහොගතොව,
පුනබ්‌භවුප්‌පත්‌ති සරීරභෙදො
දුක්‌ඛො’ති චින්‌තෙසි සභාවචින්‌තී;
ජාතො ස’හං ජාතිජරාරුජාදි-
ධම්‌මො’ම්‌හි තස්‌මා භවදුක්‌ඛසුඤ්‌ඤං,
නිච්‌චං අජාතිං අජරං අරොගං
ගවෙසිතුං වට්‌ටති නිබ්‌බුති’න්‌ති;
යථාපිදුක්‌ඛෙ සති ච’ත්‌ථිසාතං
තදඤ්‌ඤමුණ්‌හෙ සති සීතමත්‌ථි,
භවම්‌හි සන්‌තෙ විභවො’පි එවං
නිබ්‌බාණමත්‌ථී තිවිධග්‌ගිසන්‌තෙ;
සාවජ්‌ජධම්‌මෙ ඉහවිජ්‌ජමානෙ
සංවිජ්‌ජතෙ භො නිරවජ්‌ජධම්‌මො,
අජාති හොති සති ජාතියා’ති
එවං විචින්‌තෙසි සදත්‌ථවින්‌තී;
දිස්‌වා යථා ගුථගතො තළාකං
න තස්‌ස දොසො න තමොතරෙය්‍ය,
කිලෙසධොවෙ අමතම්‌හි සන්‌තෙ
තථා න සෙවෙථ න තස්‌ස දොසො;
පාපාරිරුද්‌ධො සති ඛෙමමග්‌ගෙ
න තස්‌ස දොසො න සුඛං වජෙය්‍ය,
පාපාරිරුද්‌ධො සති ඛෙමමග්‌ගෙ
තථා නගච්‌ඡෙය්‍ය න තස්‌ස දොසො; (යමකබන්‌ධනං)
යථාපි වෙජ්‌ජෙ සති ඝොරරොගී
න තස්‌ස දොසො ත ලභෙ තිකිච්‌ඡං,
රාගාදිරොගී සති බුද්‌ධවෙජ්‌ජෙ
ධම්‌මොසධං නෙ’ච්‌ඡති කස්‌ස දොසො;
යො කණ්‌ඨබද්‌ධං කුණපං පහාය
යථාසුඛං ගච්‌ඡති සෙරිචාරී,
තථෙවි’මං කුච්‌ඡිත පූතිකායං
යංනූන ගච්‌ඡෙය්‍යමහං ජහිත්‌වා;
උච්‌චාරඨානම්‌හි ජනා’නපෙක්‌ඛා
කත්‌වා කරීසානි කයථා වජන්‌ති,
තථා සරීරං කුණපෙහි පූරං
යංනූන ගච්‌ඡෙය්‍යමහං ජහිත්‌වා;
නාවං යථා ජජ්‌ජරමාපගාහිං
වජෙය්‍ය නෙතා අතපෙක්‌ඛකොව,
තථා නවද්‌වාරසවං සරීරං
යංනූන ගච්‌ඡෙය්‍යමහං ජහිත්‌වා;
චොරෙහි ගච්‌ඡං අවහාරභීත්‍යා
ඛෙමං සුමෙධො පුරමොතරෙය්‍ය,
තථා සරීරං කුසලාවහාරං
යංනූන ගච්‌ඡෙය්‍යමහං ජහිත්‌වා;
නෙක්‌ඛම්‌ම සඞ්‌කප්‌ප පරො’පමාහි
අනුස්‌සරිත්‌වෙ’වමුළාරවීරො,
හතො’රපාරෙ තිභවෙ අසාරෙ
විහාසි උක්‌කණ්‌ඨිතමානසො සො;
සුවණ්‌ණ මුත්‌තා මණි රූපියාදි-
ධනෙහි ධඤ්‌ඤෙහි ච පූරිතානි,
අවාපුරිත්‌වාන,ථ කොසකොට්‌ඨා-
ගාරානි තං දස්‌සයි රාසිවඩ්‌ඪො;
පිතාමහානං පකපිතාමහානං
මාතාපිතුන්‌නං විභවා පනෙත්‌ථ,
අනප්‌පකාථාවරජඞ්‌ගමාතෙ
සංදිස්‌සරෙ ධීර සුමෙධවිප්‌ප;
සො සත්‌තමා යාව පවෙණිවට්‌ටා
විභාවයිත්‌වා විභවස්‌සරාසිං,
ධනාගමස්‌සාපි ධනබ්‌බයස්‌ස
පමාණ’මාචීක්‌ඛිපමාණදස්‌සිං;
කුටුම්‌බමෙතං පටිපජ්‌ජමානො
කාමෙසු දෙවොවිය ඉන්‌ද්‍රියානි,
ඉච්‌ඡානුරූපං පරිචාරයස්‌සු
ඉච්‌චෙව මාරොචයි රාසිවඩ්‌ඪො;
අමුං මහන්‌තං ධනධඤ්‌ඤරාසිං
සමාවිනිත්‌වෙ’ක කහාපණම්‌පි,
නා’දාය මාතාපිතරොප්‍ය’හො තො
ගතා යථාකම්‌ම මිතො පරත්‌ථ;
තබ්‌බත්‌ථුසාරග්‌ගහණාතිසූරො
වොස්‌සග්‌ගසන්‌තො අථ සත්‌තසාරො,
රඤ්‌ඤො සමාරොචිය එතමත්‌ථං
භෙරිං චරාපෙසි සකෙ පුරම්‌හි;
සන්‌තප්‌පයි භෙරිවිරාවගන්‌ධ-
මාඝාය සම්‌පත්‌තජාතා’ලිජාතං,
භොවාදි නානාරතනාදිභොග-
මධූහි සත්‌තාහ’මනාථනාථො;
තදග්‌ග යඤ්‌ඤාලය වාරිවාහ-
ධාරානිපාතද්‌ධනවුට්‌ඨිහෙතු,
මහා ජනස්‌සා’ධිකවත්‌ථුතණ්‌හා-
තටානි භින්‌නානි මනොදහෙසු;
සුඛෙධිතො කාමසුඛං පහාය
ඝරා’භීනික්‌ඛම්‌ම තතො සුමෙධො,
අජ්‌ඣොගහෙත්‌වා හිමවන්‌ත’මාප
ධම්‌මෙසකො ධම්‌මකපකබ්‌බත’න්‌තං;
විතක්‌කමඤ්‌ඤාය’ථ දෙවරඤ්‌ඤා
ව්‍යාපාරිතො මාපයි විස්‌සකම්‌මො,
තහිං විවෙකක්‌ඛමක මස්‌සමඤ්‌ච
මනොරමං චඞ්‌කමභුමිභාගං;
තමස්‌සමං පබ්‌බජිතෙහි සුඤ්‌ඤං
උපෙච්‌ච සොඤ්‌චාරමවාපුරිත්‌වා,
ඤත්‌වා තදන්‌තොලිඛිත’ක්‌ඛරානි
ඛාරිංපරික්‌ඛාරභරංඅවෙක්‌ඛි;
නිවත්‌ථවත්‌ථංනවවදොසුපෙතං
විවජ්‌ජියාවජ්‌ජියවජ්‌ජදස්‌සි,
ධාරෙසිතංබාරසධානිසංස-
මනොජපුප්‌ඵත්‌ථරවාකචීරං;
පුන්‌නාගපුප්‌ඵත්‌ථරකා’භිරාමං
අංසෙ විධායා’ජිනචම්‌මඛණ්‌ඩං,
කත්‌වා ජටාමණ්‌ඩල මිත්‌තමඞ්‌ගෙ
තිවඞ්‌ක මාදාය’ථ ඛාරිකාජං;
භුජඞ්‌ගභොගො’රුභුජෙන ධීරො
ආදාය චාලම්‌බනදණ්‌ඩකොටිං,
සමග්‌ගහී තාපසවෙසමෙවං
විරත්‌තචිත්‌තොක විභවෙව භවෙ’පි;
සො චඞ්‌කමී චඞ්‌කමමොතරිත්‌වා
සිලාතලස්‌මිඤ්‌ච දිවා නිසජ්‌ජි,
සායං පවිට්‌ඨො වසි පණ්‌ණසාලං
නිපජ්‌ජි කට්‌ඨත්‌ථරසෙසමඤ්‌චෙ;
පචචූසකාලම්‌හි පබුජ්‌ඣිතො සො
ආවජ්‌ජයිත්‌වා’ගමනප්‌පවත්‌තිං,
විවෙකකාමස්‌ස මමෙ’ත්‌ථ වාසො
කාමං ඝරාවාසසමො සියා’ති;
අදුඤ්‌හි පණ්‌ණච්‌ඡදනං කපොත-
පාදාරුණං බෙලුවපක්‌කවණ්‌ණා,
භූමීපි භිත්‌තී රජතාවදාතා
මඤ්‌චො’පි චිත්‌තත්‌ථරවාරුරූපො;
සුභාක මනාපා මම පකණ්‌ණසාලා
සාදීනවා දුප්‌පරිභාරියා’යං,
පණීතභික්‌ඛා පරියෙට්‌ඨි මූල-
දුක්‌ඛස්‌ස නත්‌ථි’ති පමාණ මන්‌තො;
අගාරසඤ්‌ඤාය පටික්‌ඛපිත්‌වා
තඤ්‌ච’ට්‌ඨදොසා කුලපණ්‌ණසාලං,
දසඞ්‌ග සාධාරණ රුක්‌ඛමූලං
ඵලාඵඛලාහාර මුපෙච්‌ච භොජී;
සුමෙධසො සො දිවසානි සත්‌ත
මහාපධානං පදහං සුමෙධො,
පත්‌තො අභිඤ්‌ඤාසු වසිසු පාරං
සබ්‌බංක සමාපත්‌තිසුඛං අවින්‌දි;
තස්‌මිංඛණෙ කානන දෙවතාහි
සාධූ’ති නිග්‌ඝොසිතපීතිඝොසො,
අබ්‌භුග්‌ගතො තස්‌ස යසෙන සද්‌ධිං
විසුද්‌ධවිජ්‌ජාචරණු’බ්‌භවෙන;
විජ්‌ජාධරා තග්‌ගුණදීපකානි
මුතිඞ්‌ගවීණාධනිබන්‌ධවානි,
ගායිංසු ගීතානි’ව නච්‌චමානො
හිමාචලො සම්‌පති සම්‌පවෙධි;
මුද්‌ධඞ්‌කුරං භුධරකුටබාහු-
සතෙහි තන්‌නිජ්‌ඣර චාමරෙහි,
විධූයමානෙහි විධූතපාපං
කතොපහාරෙව මහාසරා’පී;
අකාලමෙඝද්‌ධනි භෙරිරාව-
ව්‍යාපාරිතා මත්‌තසිඛණ්‌ඩිසණ්‌ඩා;
අජ්‌ඣාවසන්‌තං වනසණ්‌ඩමජ්‌ඣං
මහිංසුචා’ඛණ්‌ඩනතණ්‌ඩවෙන;
මන්‌දා’නිලා’මන්‌දභුජා’වලම්‌බ-
සුනීලසාඛාමණිවිජනීහි,
ලතඞ්‌ගනා’ලිඞ්‌ගිතසාලසාමී
සංවිජයුං විතදරම්‌පි ධීරං;
කපීතනා’සොක තමාල නීපා
කපීතනා’සොක තමාල නීපා, (සමත්‌තපාදභ්‍යාස මහා යමකං)
කපීතනා’සොක තමාල නීපා
කපීතනා’සොක තමාල නීපා;
න වෙලලිතා කිං පසවකා’වතංසා
ලතාවිතානා මධුපාලිසාලී,
ලතාවිතානා මධුපා’ලිසාලී
න වෙල්‌ලිතා කිං පකසවා’වතංසා;(සමුග්‌ගභෙද යමකං)
පුප්‌ඵාවලී කන්‌දල පාටලග්‌ගා
කලාපිනී සා වනරාජිනීලා,
පුප්‌ඵාකුලී කන්‌දන පාටලක්‌ඛී
කලාපනීලා වර රාජිනීව; (අද්‌ධගොමුත්‌තිකා බන්‌ධනං)
නතාසිරො මඤ්‌ජරිකාසුරම්‌හා
නතාසිරො පඤ්‌ජලිකාව රම්‌මෙ,
වනෙ නිබද්‌ධං රමිතො විභාසි
විනෙය්‍ය බන්‌ධූරචීතො පහාරො; (පාදගොමුත්‌තිකා බන්‌ධනං)
රජොකිරන්‌තා’වනතා ලතාසුං
ලාජොකිරන්‌තා වනිතා නතාව,
ද්‌විජොඅරඤ්‌ඤං වසිතා පිතාඝො
ගජොතරන්‌තොව ලතා විතානං; (සිලොකගොමුත්‌තිකා බන්‌ධනං ආකුලජාලමිතිපි)
මතඞ්‌ගජින්‌දා න මසක්‌කරිංසු
පාදානි නත්‌වාන පදිපධාමං,
පඤ්‌ඤාධවං පීන තපං ඵලෙහි
හිමද්‌දිපාදෙ පරිසුත්‌තමඤ්‌හි; (කබ්‌බනාම ගබ්‌භ චක්‌කං)
මෙත්‌තාය ඡත්‌තං’ව ඵණං ඵණින්‌දො
ධාරෙසි සීසෙ වසිනො චචාර,
නථාමවා’කාව’බලෙසු කිඤ්‌චි
මෙධාය නන්‌දො ථිරවාචි ඛෙමෙ; (කවිනාම ගබ්‌භ චක්‌කං)
නො’සිතෙහි’ස්‌ස සන්‌තාස’නූ’න
තොස වතො දො,
තොස වතො දො,
දායතො වසතො න’නුසන්‌තාසස්‌ස
හිතෙසිනො; (ගාථද්‌ධවිසය පටිලොම යමකං)
හිතෙසිනො; (ගාථද්‌ධවිසය පටිලොම යමකං)
යොකා’සා’වාස කායො කාම’කාම’මකාම’කා,
සකායනා’නාය’කාස වාම නා ග ගනා’මවා; (සබ්‌බතො භද්‌ද බන්‌ධනං)
දයාය වසිතො දායෙ යාපජාසිව මාසදා,
යජාරහං රඤ්‌ජමානො වසිහංසො චිරංවසි; (අද්‌ධබ්‌භම බන්‌ධනං)
මධුමද මධුකර විරුතෙ විරුතෙ
මලයජ සුරහීත පවනෙ පවනෙ
හිමවති විකසිත පදුමෙ පදුමෙ
අධිසුඛ මනුභවි සවසි සවකසි; (පාදන්‌ත යමකං)
ඉති මෙධානන්‌දාභිධානෙන යතිනා විරචිතෙ සකලකවිජන හදයානන්‌දදානනිදානෙ ජිනවංසදීපෙ දූරෙනිදානෙ සුමෙධබ්‍රාහ්‌මණාපදානපරිදීපො.
පඨමො සග්‌ගො.
1.මන්‌දා’ක්‌කන්‌තා) මරපුරසිරිං සබ්‌බසම්‌පත්‌තිසාරං
ජම්‌බුද්‌දීපා’සම සරසිජෙ කණ්‌ණිකා සන්‌නිකාසං,
රම්‌මං රම්‌මව්‌හය පුරවරං පාරමීපාරදස්‌සී
බුද්‌ධො දීපඞ්‌කර දසබලො සබ්‌බලොකෙකදී; ()
2.තස්‌මිං කාලෙ විපුලකරුණා නාරිසඤ්‌චොදිත’ත්‌තො
නානා ඛීණාසව පරිවුතො චාරිකං සඤ්‌චරන්‌තො,
සංවත්‌තෙන්‌තො සුනිපුණතයං ධම්‌මචක්‌කං කමෙන
පත්‌වා තස්‌මිං පටිවසති සොදස්‌සනව්‌හෙ විහාරෙ; ()
සුත්‌වා දිපඞ්‌කර භගවතො නාගරා කිත්‌තිසද්‌දං
සම්‌බුද්‌ධො සො ඉතිපි අරහං ත්‍යාදිනා’බ්‌භුග්‌ගතං තං,
ගාහාපෙත්‌වා තුවටතුවටං වත්‌ථභෙසජ්‌ජ පානං
තන්‌නිත්‌තා’සුං පමුදිතමතා ගන්‌ධමකාලාදිහත්‌ථා; ()
පත්‌වා දීපඞ්‌කරතරිහරිං ගන්‌ධමාලාදිකෙහි
පූජෙත්‌වාත’ඤජලිමුකුලිකා එකමන්‌තං නිසින්‌නා,
ධම්‌මං සුත්‌වා සවණසුභගං බුද්‌ධපාමොක්‌ඛසඞ්‌ඝං
සංයාචිත්‌වා මුදිතහදයා ස්‌වාත්‌තයා’පගඤ්‌ජුං; ()
සජ්‌ජෙත්‌වා තෙ දුතියදිවසෙ සජ්‌ජනා දානසාලං
උස්‌සාපත්‌තා ධජකදලියො පුණ්‌ණකුම්‌භෙ ඨපෙන්‌නා,
කුබ්‌බන්‌තා’පි ධවලසුළිනු’ක්‌ඛෙප ලාජොපහාරං
එවං තස්‌සා’ගමන මයනං ලඞ්‌කරොන්‌තා විහාසුං; ()
අබ්‌භුග්‌ගන්‌ත්‌වා අථ හිමවතා සො සුමෙධො තපස්‌සි
ගච්‌ඡං තෙසං උපරි නභසා වාකචීරං ධුනන්‌නො,
දිස්‌වා පීතිප්‌පමුදිතජතෙ අඤ්‌ජසං සොධයන්‌තෙ
සඤ්‌ඣාමෙඝො රිව පරිලසං ධතරිත්‌ථෙ’කමන්‌තං; ()
සංසොධෙන්‌තා කලලවිසමට්‌ඨාන සඞ්‌කාරධානං
කස්‌මා තුම්‌හෙ පටිපථමිමං’ලඞ්‌කරොථා’ති පුච්‌ඡි,
භන්‌තෙ දීපඞ්‌කරතරහරි’දානි නිස්‌සාය රම්‌මං
බුද්‌ධො හුත්‌වා විහරති මහාධම්‌මසඞ්‌ඛං ධමන්‌තො; ()
සො සම්‌බුද්‌ධො පරිවුතමහාභික්‌ඛුසඞ්‌ඝො යතො නො
ගාමක්‌ඛෙත්‌තං පවිසති තතො’ලඞ්‌කරොමා’බ්‍රුවිංසු,
බුද්‌ධූප්‌පාදො කිමුත සුතරං දුල්‌ලභො බුද්‌ධසද්‌දො
ඉච්‌චෙවංසො සුමරිය අලඞ්‌කත්‌තුකාමො’සි මග්‌ගං; ()
ඣානා’භිඤ්‌ඤා රතතකවචු’ජ්‌ජොතමාන’ත්‌තභාවො
සද්‌ධායෙ’සො අචලසදිසො ඉද්‌ධිමා තාපසො’ති,
සල්‌ලක්‌ඛෙත්‌වා කලලවිසමං දුග්‌ගමග්‌ගප්‌පදෙසං
සජ්‌ජෙතුං තෙ සපදි මුදිතා සාධවො තස්‌ස’දංසු; ()
නානාපුප්‌ඵං ජලජථලජං ඔචිනිත්‌වා වනම්‌හා
තෙත්‌වා දෙවාසුරභවනතො කොවිළාරාදිපුප්‌ඵෙ,
ආනෙත්‌වා’හං භුජගභවතා ඵුල්‌ලකණ්‌ඩුප්‌පලානි
ඡෙකොස්‌මී’ති විථරිය පථං ඉද්‌ධියා සංවිධාතුං; ()
කත්‌වෙ’වං මෙ හදයමකුළං තොවිකාසෙය්‍ය තස්‌මා
වෙය්‍යාවච්‌චං විසදමතිනො කායිකං සංවිධාය,
අජ්‌ජෙවා’හං විපුලකුසලං සඤ්‌චිනිස්‌ස’න්‌තී ධීරො
සංසොධෙතුං කලලකලුසං අඤ්‌ජසං ආරභිත්‌ථ; ()
පස්‌සන්‌තානං විමලනයනො’භාස ජිමූතගබ්‌භෙ
බුද්‌ධොබුද්‌ධො’ත්‍ය’භිහිතවචො විජ්‌ජුරාජීව චාරී,
තස්‌මිං පඞ්‌කෙ නිජකරතල’මෙභාජපච්‌ඡිහි ධීමා
පංසුං දත්‌වා රජතධවලං වාලුකං වොකිරන්‌තො; ()
තස්‌මි ඨානෙ කල්‌ලලුලිතෙ සුට්‌ඨු නා’ලඞ්‌කතෙව
සද්‌ධිං දීපඞ්‌කර’නධිවරො’නෙකඛීණාසවෙහි,
පත්‌තො බ්‍රහ්‌මා’මරනරඵණිසිද්‌ධවිජ්‌ජාධරානං
සංවත්‌තන්‌තෙ සුවිපුලමහෙ පාටිහීරෙ උළාරෙ; ()
හෙම’ම්‌භොජො’පමසුවදනං මණ්‌ඩිතං ලක්‌ඛණ්‌හො-
සීත්‍යා’නුබ්‍යඤ්‌ජනවිලසිතං කෙතුමාලාවිලාසං,
සත්‌ථාරං තං දිසිදිසි පභානිච්‌ඡරන්‌ත’ඤ්‌ජසම්‌භි
ආගච්‌ඡන්‌තං විය මණිතලෙ මත්‌තමාතඞ්‌ගරාජා; ()
ඔලොකෙත්‌වා විමලනයනඤ්‌චන්‌දනිලුප්‌පලානි
උම්‌මිලෙත්‌වා රතනඵලකං අක්‌කමන්‌තොව පිට්‌ඨිං,
නානාඛීණාසවපරිචුතො කද්‌දමං නා’ක්‌කමිත්‌වා
සම්‌බුද්‌ධොයං වජතු ඉති මෙ දීඝරත්‌තං හිතාය; ()
සල්‌ලක්‌ඛෙත්‌වා ඛර’ජිනජටාවාකචීරානි කෙසෙ
ඔමුඤ්‌චිත්‌වා විසමකලලෙ පත්‌ථරිත්‌වා’ත්‌තභාවං,
සෙතුං කත්‌වා පරමපණිධී කොමිනී චොදිත’ත්‌තො
පඤ්‌චා’භිඤ්‌ඤාරතනමණිමා ස්‌වා’චකුජ්‌ජො නිපජ්‌ජි; ()
සුත්‌වා ගාථාපදම්‌පි න මෙ භාරියං සංකිලෙසෙ
විද්‌ධංසෙත්‌වා වරසිවුරං පත්‌තුමිච්‌ඡෙ සචා’හං,
සංවිජ්‌ජන්‌තෙ තිභවභවනෙ දුක්‌ඛිතා’නන්‌තසත්‌තෙ
සො’භං එකො කථමධිගමෙ ධම්‌ම මඤ්‌ඤාතවෙසො;()
යන්‌නූනා’හං පරහිතරතො සම්‌මදඤ්‌ඤාය බොධිං
ආරොපෙත්‌වා නිඛිලජනතං’නුත්‌තරං ධම්‌මනාවං,
උත්‌තාරෙත්‌වා වරසිවපුරං වට්‌ටදුක්‌ඛොදධිම්‌හා
පච්‌ඡා දීපඞ්‌කරමුනි යථා නිබ්‌බුතිං පාපුණිස්‌සං; ()
ඉච්‌චෙවං සො පුමරිය සමොධානයිත්‌වා’ට්‌ඨධම්‌මෙ
සංසාරම්‌හා’වතරණමහාසෙතුරූපො පජානං,
මුද්‌ධාබද්‌ධ’ඤ්‌ජලිපුටජටො පඞ්‌කපිට්‌ඨෙ නිපන්‌නො
සම්‌බොධත්‌ථං පණිධිමකරි තාව තප්‌පාදමූලෙ; ()
උස්‌සිසඨො සපදි භගවා පඤ්‌චවණ්‌ණප්‌පසාදං
උම්‌මීලෙත්‌වා නයනයුගලං ඵුල්‌ලනීලුප්‌පලාභං,
දිස්‌වා නීලොපලමණිමයං වාතපානඤ්‌චයං’ව
උග්‌ඝාටෙන්‌තො ඉසිවරම්‌හාපඞ්‌කජං පඞ්‌කපිට්‌ඨෙ; ()
එතස්‌සි’ජඣිස්‌සති ඉති අයං පත්‌ථනා’නාගතංස-
ඤාණං සම්‌මා පතිනිය ඉතො කප්‌පලක්‌ඛාධිකානං,
ආවජ්‌ජෙන්‌තො උපරි චතුරාසඞ්‌ඛියානන්‌ත්‍ය’වෙදි
පත්‌වා බොධිං අහමිව සියා ගොතමො නාම බුද්‌ධො; ()
තුම්‌හෙ සම්‌පස්‌සථ ඉති ඉමං තාපසං සඞ්‌ඝමජ්‌ඣෙ
වත්‌වෙ’වං සො පදමසදිසං ධම්‌මරාජා දදන්‌තො,
සම්‌හින්‌දිත්‌ථා’ධරකිසලයා’ලත්‌තකං නාගතංය-
පඤ්‌ඤාමුද්‌දා’ඞ්‌කිතපදසතං වත්‌තසන්‌දෙසගබ්‌භං; ()
වාසට්‌ඨානං කපිලනගරං නාම මාසාමහෙසි
මාතා සුද්‌ධොදනනරපති තෙ පිතා’දිච්‌චවංසෙ,
බිම්‌බා බිම්‌බා ධරවති පියා හෙම බිම්‌බා භිරාමා
තස්‌මිංකාලෙ තනුජරතනං රාහුලො හෙස්‌සතෙ තෙ; ()
හෙස්‌සන්‌තෙ තෙ පඨමදුතියස්‌සාවකා සාරිපුත්‌ත-
මොග්‌ගල්‌ලානා ද්‌විජකුලභවා භුරිපඤ්‌ඤිද්‌ධිමන්‌තො,
ආනන්‌දාඛ්‍යො යති පති රුපට්‌ඨායකොසාවිකානං
ඛෙමාථෙරි පරම යුගලං උප්‌පලබ්‌බණ්‌ණථෙරි; ()
අස්‌සත්‌ථො තෙ විජයවිටපී ත්‌වඤ්‌ච ඛො ගොතමව්‌හො
ඡබ්‌බස්‌සානී පදහිය ඝරා නික්‌ඛමිත්‌වා සකම්‌හා,
පායාසග්‌ගං පරිවිසිය භො ත්‌වං සුජාතාය දින්‌නං
බොධිං බුජ්‌ඣිස්‌සසි ඉති ධුවං බොධිමූලෙ නිසජ්‌ජ; ()
සත්‌ථා සඤ්‌ඣාඝනපටලතො මුත්‌තවිජ්‌ජුල්‌ලතෙ,ව
සන්‌දස්‌සෙත්‌වා නිජභුජලතං චීවරබ්‌භන්‌තරම්‌හා,
පඛ්‍යාකාසි ජලධරරවා’කාරගම්‌භීරඝොයං
නිච්‌ඡාරෙත්‌වා සුරධනුරිවො’භාස ඡබ්‌බණ්‌ණරංසි; ()
අම්‌හෙ දීපඞ්‌කරභගවතො සාසනෙ නා’වබුද්‌ධා
ලච්‌ඡාමා’ති තව පරිමුඛෙ’වා’යතිං මොක්‌ඛධම්‌මං,
තස්‌මිං පත්‌තා’ඛීල සුරනරාපත්‌ථයුං තඞ්‌ඛණෙවං
පූජෙත්‌වා’තඤ්‌ජලිසරසිජෙ පාදපීඨම්‌හි තස්‌ස; ()
බුද්‌ධො බ්‍රහ්‌මාමරනරසිරො චුම්‌බිතඞ්‌ඝී සරොජො
සම්‌පූජෙත්‌වා’ට්‌ඨහි ජටිලකං පුප්‌ඵමුට්‌ඨීහි තම්‌හා,
පක්‌කාමි සො කනකසිඛරීහාරි කිඤ්‌ජක්‌ඛභාරෙ
උබ්‌භූත’ම්‌හොරුහවනසිරෙ අප්‌පයන්‌තො පදානි; ()
රම්‌මං රම්‌මං මහීය ජටිලං පුප්‌ඵමුට්‌ඨීහි කත්‌වා
ඛීණා ඛීණාසවවසිගණා දක්‌ඛිණං පක්‌කමිංසු,
දෙවා’දෙවා පවුරමකරුං වන්‌දනාමානපූජං
දීපං දීපඞ්‌කරදසබලඤ්‌චා’නුගන්‌ත්‌වා නිවත්‌තා; ()
තම්‌හා ඨානා ගතසති ජනෙ සන්‌නිසින්‌නස්‌ස තස්‌ස
පල්‌ලඞ්‌කෙනා’මරනර පරිච්‌චන්‌ත පුප්‌ඵාසනම්‌හි,
ජාතික්‌ඛෙත්‌තා තහිමුපගතා දෙවතා එතමත්‌ථං
ආරොචෙසුං මහිතවරණා අඤ්‌ජලිමඤ්‌ජරීහිං; ()
පුබ්‌බෙ පුප්‌ඵාසනුපරි සමාරූළ්‌හබුද්‌ධඞ්‌කුරානං
අද්‌ධානෙ’වෙ’තරහි භවතොචා’සනාරොහණම්‌හි,
එකාලොකා දසහි ගුණිතා ලොකධාතු සහස්‌සී
සංවත්‌තන්‌තෙ ත්‌වමනවරතං හෙස්‌සසෙ තෙන බුද්‌ධො; ()
තාසං වාචං සවණමධුරං දෙවතානං නිසම්‌ම
භිය්‍යො චිත්‌තප්‌පභවවීරියො පීතිවිප්‌ඵාරිතත්‌තො,
පුබ්‌බෙ සත්‌තුත්‌තමපරිචිතා බොධිසම්‌භාරධම්‌මා
ආවජ්‌ජෙසි කති ඉති සුධී ධම්‌මධාතුං සහෙතුං; ()
ඔකුජ්‌ජිත්‌වා ධරණිඨපිතො පුණ්‌ණ කුම්‌භො සුමෙධ
විස්‌සන්‌දෙත්‌වා සලිලම්‌ඛිලං කින්‌තුපච්‌චාහරෙථ,
එවං දත්‌වා ධනසුතකලත්‌ත’ඞ්‌ගපච්‌චඞ්‌ගජීවෙ
නිබ්‌බින්‌නො මා භවි’ති පඨමං පාරමිං’ධිට්‌ඨහි සො; ()
නා’පෙක්‌ඛිත්‌වා යථරිව නිජං ජීවිතං ජීවිතං’ව
රක්‌ඛන්‌තො සඤ්‌චරති චමරි චාමර චන්‌දිකාභං,
එවං සීලං වරසිවපුරද්‌වාරමාරක්‌ඛ ධීර
අජ්‌ඣිට්‌ඨාසි ඉති සදුතියං පාරමිං සුද්‌ධසීලො; ()
සංවිග්‌ගො යො චිරපරිවසං ඝොරකාරාඝරම්‌හි
මුත්‌තීං තම්‌හා’ගමයති යථා හොහි නෙක්‌ඛම්‌මනිත්‌තො
නිබ්‌බින්‌නො ත්‌වං තථරිව භවෙ බන්‌ධනාගාරරූපෙ
අජ්‌ඣිට්‌ඨාසි තතියම්‌පි සො පාරමින්‌ත්‍යෙ’කචාරී; ()
හීනුක්‌කට්‌ඨං කුලමනුඝරං භික්‌ඛකො භික්‌ඛු භික්‌ඛං
අණ්‌වාහිණ්‌ඩං ලභති නචිරං සංවරට්‌ඨො යථෙ’වං,
සම්‌බොධත්‌ථ භජ පටිබලෙ පණ්‌ඩිතෙ පුට්‌ඨපඤ්‌හො
අජ්‌ඣිට්‌ඨාසි ත්‌වමිති මතිමා පාරමිං සො චතුත්‌ථිං; ()
නිච්‌චුස්‌සාහො විචරති යථා කෙසරී සෙරිචාරී
එවං ඨානෙ ගමනසයනෙචා’සනෙ ත්‌වං සුමෙධ,
උස්‌සොළ්‌හී ත්‍යාසිථිලවීරියො හොති සම්‌බොධනත්‌ථං
අජ්‌ඣීට්‌ඨාසි ථිරවීරියවා පඤ්‌චමිං පාරමිං සො; ()
ඉට්‌ඨානිට්‌ඨං පථවිරිව භො සබ්‌බමානාවමානං
නාපජ්‌ජිත්‌වා මනසිවික්‌තිං ත්‌වං සහන්‌තො ඛමන්‌තො,
සම්‌බොධත්‌ථං පරවධඛමො හොහි’තී ඛන්‌තිවාදී
අජ්‌ඣිට්‌ඨාසි පරහිතරතො ඡට්‌ඨමිං පාරමිං සො; ()
වීථිං නාතික්‌කමති නියමං ඔසධීතාරකා’යං
එවං සන්‌තුත්‌තම පරිචිතං සච්‌චවාචං සුමෙධ,
ත්‌වං මාවිතික්‌කමි කරහචි බොද්‌ධුකාමො සුබොධිං
අජ්‌ඣිට්‌ඨාසි’ත්‍ය’විතථකථි සත්‌තමිං පාරමිං සො; ()
තම්‌හාඨානා බලවපවනෙ වායමානෙ’පි ථොකං
කප්‌පට්‌ඨාසි තචලති යථා පබ්‌බතො සුප්‌පතට්‌ඨො,
ත්‌වං තිට්‌ඨාහි තථරිව අධිට්‌ඨානධම්‌මෙසු දළ්‌හං
අජ්‌ඣිට්‌ඨාසී’ත්‍යවලසදිසො ච’ට්‌ඨමිං පාරමිං සො; ()
ඔතිණ්‌ණෙසු උදකරහදො භො නිහීනුත්‌තමෙසු
සීතත්‌තං සම්‌ඵරති හි සමං වාරිනා භාවයෙනි,
මෙත්‌තායෙවං තිභවභවනෙ සබ්‌බසත්‌තෙසු තුල්‍යං
අජ්‌ඣිට්‌ඨාසි සමුති නවමිං පාරමිං මෙත්‌ත චිත්‌තො; ()
ඉට්‌ඨානිට්‌ඨෙ සති පටිහතෙ වත්‌ථුජාතෙ යථාහි
මජ්‌ඣත්‌තා’යං වසුමතිවධූ හොති දුක්‌ඛෙ සුඛෙක වා,
එවං භො ත්‌වං භව සමතුලාසන්‌තිභො’පෙක්‌ඛ කො’ති
අජ්‌ඣිට්‌ඨාසි සවසි දසමිං පාරමිං භුරිමෙධො; ()
ආලොලෙන්‌තො තිදසපමිතං පාරමිසාගරං සො
සත්‌තාධිසො නිසිතමතිමා ඤාණමත්‌ථා’චලෙන,
ආවජ්‌ජෙසි වසුමතවධු සාධුකාරං’ව දෙන්‌ති
සංකම්‌පි සම්‌පති සතිමතො ධම්‌මතෙජෙන තෙන; ()
භීරූච්‌ඡම්‌හී ඝණපථවියා කම්‌පමාතායි’මාය
පත්‌වා දීපඞ්‌කරභගවතො රම්‌මවාසී සමීපං,
සම්‌පුච්‌ඡිංසු වසුමති භුසං කම්‌පි තංකිස්‌සහෙතු
ආවජ්‌ජෙත්‌වා සමුති මුනිනො තම්‌පවත්‌තිං කථෙසි; ()
නික්‌කඞ්‌ඛා තෙ පුනපි නගරා නාගරා තං උපෙච්‌ච
සම්‌පූජෙසුං චරණයුගලං ගන්‌ධමාලාදිකෙහි,
කත්‌වා තෙන’ඤ්‌ජලිසරසිජෙ යෙන දීපඞ්‌කරෙ’ණො
උට්‌ඨාසි සො පුරිසතිසහො සන්‌නීසින්‌නාසනම්‌හා; ()
මා තෙ රොගො භවි පටිභයං මා භවි ඡම්‌භිතත්‌තං
සඞ්‌කප්‌පො තෙ පරමපණිධි සිජ්‌ඣතං ඛිප්‌පමෙව,
ඉත්‌ථඤ්‌චා’සිථුතිපදසතං ජාතිඛෙත්‌තා ගතා තං
පුප්‌ඵාදීහි මහීය ජටිලං නිජ්‌ජරා බ්‍යාහරිංසු; ()
අබ්‌භුග්‌ගන්‌ත්‌වා පවනපදවිං දෙවතානං මනානි
බොධාත්‌වො හිමවති සකං අස්‌සමං තාපසො සො,
පත්‌තො අත්‌ථාචලමුපගමී තඞ්‌ඛණෙ රංසිමාලී
සඞ්‌කොචෙත්‌වා සරසිජවනං සංහරිත්‌වා’ංසුජාලං; ()
රම්‌මං දීපඞ්‌කරභගවතො රම්‌මවත්‍යා’භිධානං
වාසට්‌ඨානං ජනකජනනී ද්‌වෙ සුදෙවස්‌සුමෙධා,
නිච්‌චොපට්‌ඨායකයතිවරො සාගතොමඞ්‌ගලොච
තිස්‌සොචා’සුං පඨමදුතියස්‌සාවකා ථෙරනාගා; ()
නානාඛීණාසවපරිවුතො චා’සි නන්‌දා සුනන්‌දා
තස්‌සා’හෙසුං පඨමදුතියස්‌සාවිකා අග්‌ගභූතා,
කායො’සිතිරතනපමිතො පිප්‌ඵලිනාමබොධි
අට්‌ඨාසි සො පචුරජනතං තාරයං වස්‌සලක්‌ඛං; ()
සත්‌ථා දීපඞ්‌කරව්‌හො සුරනරසරණොදීපදීපොචිරස්‌සං
දීපෙවො ධම්‌මදීපං තිභුවනභවනෙ වීත’විජ්‌ජන්‌ධකාරං
අග්‌ගික්‌ඛන්‌ධො’වභාසං විහරිය පරිනිබ්‌බායි ඛීණාසවා’පි
ඛීණස්‌නෙහාපදීපායථරිව අරියා සාවකා නිබ්‌බුතා’සුං; ()
ඉති මෙධානන්‌දාභිධානෙන යතිනා විරචිතෙ සකලකවිජන හදයානන්‌දදානනිදානෙ ජිතවංසදීපෙ දූරෙනිදානෙ සුමෙධ තාපසස්‌ස මූලපණිඨානට්‌ඨපනපවත්‌ති පරිදීපො දුතියො සග්‌ගො.
ලොකං (’වසන්‌තතිලකො) කුමුදාකරං මා
කොණ්‌ඩඤ්‌ඤනාමභගවා’ථ පබොධයත්‌තො,
ජාතො තදා වරමතී විජිතාවි රාජා
සම්‌පන්‌න චක්‌කරතනො’භවි චක්‌කමත්‌ති; ()
සඞ්‌ඝස්‌ස බුද්‌ධපමුඛස්‌ස උළාරදානං
දත්‌වා විධාය පණිධිං වරබොධියා සො,
රජ්‌ජං පහාය ජිනසාසනමොතරිත්‌වා
ඣානාන්‍ය’ලත්‌ථ පටිලඞ්‌වරප්‌පදානො; ()
තස්‌සා’සි රම්‌මවතිනාම පුරං සුනන්‌දො
රාජා අහොසි ජනකො ජනනී සුජාතා,
භද්‌දස්‌සුභද්‌දසමණා වරසාවකා’සුං
තිස්‌සො’පතිස්‌ස’සමණි වරසාවිකායො; ()
ලක්‌ඛායුකො විජයබොධි විසාලසාල-
කල්‍යාණි නාම තදුපට්‌ඨහි චා’නුරුද්‌ධො,
තස්‌සා’ට්‌ඨ සීතිරතනප්‌පමිතං සරීරං
ආසුං තයො අරියසාවකසන්‌නිපාතා; ()
තස්‌සා’පරෙන සමයෙනි’හ’නඞ්‌ගභඞ්‌ගො
උප්‌පජ්‌ජි මඞ්‌ගලජිනො ජනමඞක්‌ගලාය,
බුද්‌ධඞ්‌කුරො’තිරුචිරො සුරුචී සමඤ්‌ඤො
ආසි තදා’වතිසුරො ද්‌විජවංසකෙතු; ()
දත්‌වා සසාවකජිතස්‌ස දිනානි සත්‌ත
පත්‌ථෙසි බොධිමසමං ගවපානදානං,
පබ්‍යාකතො භගවතා භවනා’හීගන්‌ත්‌වා
පබ්‌බජ්‌ජිතො සුඛමවිත්‌දි සමාධිජං සො; ()
තස්‌සු’න්‌තරං පුරවරං පිතරො’ත්‌තර’ව්‌හා
ආසුං සුදෙවසමණො වසි ධම්‌මසෙනො,
තස්‌සා’ග්‌ගසාවකයුගං සකසාවිකානං
භද්‌දංයුගං අභවි සිවලිචා’ප්‍ය’සොකා; ()
තං පාලිතො ජිනමුපට්‌ඨහි අට්‌ඨ’සීති
හත්‌ථො’සි තස්‌ස වජිරූපමරූපකායො,
බොධී’පි නාගතරු සාවකසන්‌තිපාතා
ආසුං තයො නවුතිවස්‌සසහස්‌සමායු; ()
තස්‌සා’පරෙන සුමනො කරුණානිධානො
නාථො මනොජමථනො උදපාදි ලොකෙ,
බුද්‌ධඞ්‌කුරො’භවි තදා’තුලනාගරාජා
තෙජ’ග්‌ගිජාලජලිතො අතුලිද්‌ධිමා සො; ()
නාගො’පි නාගභවනම්‌හි සසාවකස්‌ස
බුද්‌ධස්‌ස දිබ්‌බතුරියෙහි කතුපහාරො,
දත්‌වාන දානමතුලං පණිධිං අකාසි
බුද්‌ධො භවිස්‌සසි තුවන්‌ති අහාසි බුද්‌ධො; ()
ඛෙමව්‌හයං පුරමහූ ජනකො සුදන්‌තො
රාජා ජනෙත්‌ති සිරිමා නිජසාවකානං;
අග්‌ගා භවිංසු සරණො වසි භාවිතත්‌තො
සොණා තදග්‌ගසමණි’සි තථු’පසොණා; ()
තස්‌සා’සි නාගතරු බොධි උදෙනතෙරො-
පට්‌ඨායකො නවුතිවස්‌සසහස්‌සමායු,
උබ්‌බෙධතො නවුතිහත්‌ථමිතං සරීරං
ආසුං තයො අරියසාවකසන්‌නිපාතා; ()
තස්‌සා’පරෙන උදපාදි’හ රෙවතාඛ්‍යො
දෙවාදිවන්‌දිතපදො භුවි දෙවදෙවො,
සත්‌තුත්‌තමො භවි තදා අතිදෙවනාමො
භොවාදිවංසතිලකො චතුවෙදවෙදී; ()
බද්‌ධඤ්‌ජලී සිරසි ධම්‌මකථං නිසම්‌ම
ගන්‌ත්‌වාන තං සරණමුත්‌තරමුත්‌තරියං;
දත්‌වා’හිපත්‌ථයි සුඛොධිමථො මහෙසි
බුද්‌ධො භවිස්‌සසි තුවන්‌තී විසාකරිත්‌ථ; ()
තස්‌සා’සි ධඤ්‌ඤවතිනාම පුරං ජිනස්‌ස
මාතා මහෙසි විපුලා විපුලො පිතා’සි,
සබ්‍රහ්‌මදෙවවරුණො භවි සඞ්‌ඝමජ්‌ඣෙ
භද්‌දා ච භද්‌දයුගලං දුවිධං සුභද්‌දා; ()
තං සම්‌භවො වසි උපට්‌ඨහි නාගබොධි
රුක්‌ඛොප්‍ය’සිතිරතනං භවි අත්‌තභාවො,
ආයුප්‌පමාණම්‌පි සට්‌ඨිසහස්‌සවස්‌සං
ආසුං තයො අරියසාවකසන්‌නිපාතාත;
තස්‌සා’පරම්‌හි සමයෙ ජනපාරිජාතො
උප්‌පජ්‌ජි සොභිතජිනො ජිතපඤ්‌චමාරො,
අජ්‌ඣායකො සකලවෙද මුළාරභොගී
බුද්‌ධඞ්‌කුරො භවි තදා’ජිතනාමවප්‌පො;
ධම්‌මං නිසම්‌ම සරණෙසු පතිට්‌ඨහිත්‌වා
සඞ්‌ඝස්‌ස බුද්‌ධපමුඛස්‌ස උළාරදානං,
දත්‌වා පධානපණිධාන මකාසි ධීරො
ත්‌වං ලච්‌ඡසි’ති වරබොධි මහාසි සත්‌ථා; ()
රම්‌මං සුධම්‌මමහු තස්‌ස පුරං සුධම්‌මො
රාජා අහොසි ජනකො ජනිකා සුධම්‌මා
තස්‌සා’ග්‌ගසාවකයුගං අසමො සුනෙත්‌තො
තස්‌සාවිකා’ග්‌ගයුගලං නකුලා සුජාතා; ()
නාගස්‌ස නාගතරු බොධි සරීරමට්‌ඨ-
පණ්‌ණාසහත්‌ථපමිතං තමතොමථෙරො,
සොපට්‌ඨහී නවුතිවස්‌සසහස්‌සමායු
ආසුං තයො අරිය සාවක සන්‌නිපාතා; ()
උප්‌පජ්‌ජි තස්‌ස අපරෙන අනොමදස්‌සි
බුද්‌ධො පබුද්‌ධකමලාමලනීලනෙත්‌තො,
බුද්‌ධඞ්‌කුරො ජිතසුරාරි තදානි යක්‌ඛ-
සෙනාපතී භවි මහිද්‌ධිමහානුභාවො; ()
සම්‌බොධි මග්‌ගපුරිසො පණිධානයං සො
සඞ්‌ඝස්‌ස බුද්‌ධපමුඛස්‌ස උළාරදානං,
පාදාසි තිසු සරණෙසු පතිට්‌ඨහිත්‌වා
බුද්‌ධො භවිස්‌සසි තුවන්‌ති ජිනො’බ්‍රුවිතං; ()
ඨානඤ්‌හි චන්‌දවතිනාම යසොධරාඛ්‍යා
මාතා මහෙසි යසවා ජනකො ජනින්‌දො,
තස්‌ස’ග්‌ගසාවකයුගං නිසභො අතොමො
ද්‌වෙ සුන්‌දරී ච සුමනා චරසාවිකා’සුං; ()
බොධී’පි තස්‌ස කකුධො මුනිදෙහමට්‌ඨ-
පණ්‌ණාසහත්‌ථපමිතං වරුණාභිධානො,
ථෙරො උපට්‌ඨහි ච ලක්‌ඛපමාණමායු
ආසුං තයො අරියසාවකසන්‌නිපාතා; ()
තස්‌සා’පරෙන පදුමො දිපදානමින්‌දො
ජාතො පබුජ්‌ඣිතමනොපදුමො පජානං,
ධීරො බභූව වරවාරණකුම්‌භභෙදී
සීහො තදා රුචිරකෙසරභාරගීවො; ()
බුද්‌ධං නිරොධසුඛවෙදියනං වතම්‌හි
සත්‌තාහමක්‌ඛිපදූමෙහි තමච්‌චයිත්‌වා,
චිත්‌තං පසාදිය පුනා’ගතසාවකෙසු
සීහො විභාසි පටිලද්‌ධවරප්‌පදානො; ()
තස්‌සා’සි චම්‌පකපුරං පදුමාභිධානො
රාජා අහොසි ජනකො අසමා ජනෙත්‌තී,
සාලොපසාලයතයො වරසාවකා’සුං
රාමා’පි තස්‌ස පරමාසමණි සුරාමා; ()
නාමෙනු’පට්‌ඨහි වසි වරුණො තමට්‌ඨ-
පණ්‌ණාසහත්‌ථමිත මස්‌ස සරීරමා’සි,
බොධි’පි සොණතරු ලක්‌ඛපමාණමායු
ආසුං තයො අරියසාවකසන්‌නිපාතා; ()
තස්‌සා’පරෙන වරදො මුනි නාරදව්‌හො
පාපන්‌ධකාරනිකරං භීදුරො’දපාදි,
බුද්‌ධඞ්‌කුරො භවි තදා’ඛිලඣාතභිඤ්‌ඤා-
ලාභී පවත්‌තඵලභොජි තපොධනීසො; ()
කත්‌වානු’ළාරපණිධාන මුළාරවිරො
දත්‌වා සසාවකජිනස්‌ස උළාරදානං,
පූජෙසි තං සුරභිනා හරිචන්‌දනෙන
සත්‌ථාපි සම්‌පති වියාකරණං අදාසි; ()
තස්‌සා’සි ධඤ්‌ඤවතිනාම පුරං සුමෙධො
රාජා අහොසි ජනකො ජනනී අනොමා,
ද්‌වෙ භද්‌දසාලජිතමිත්‌තවසි වසින-
මග්‌ගො’න්‌තරා සමණි ඵග්‌ගුණි භික්‌ඛුනීතං; ()
වාසෙට්‌ඨභික්‌ඛු තදුපට්‌ඨහි රූපකායො
තස්‌සා’ට්‌ඨසිතිරතනං මහසොණසාඛී,
බොධිද්‌දුමො නවුතිවස්‌සසහස්‌සමායු
ආසුං තයො අරියසාවකසන්‌තිපාතා; ()
තස්‌සා’පරෙන පදුමුත්‌තර ධම්‌මරාජා
ජාතො තිලොකපදුමො පදුමප්‌පිතඞ්‌ඝී,
අඩ්‌ඪො උළාරවිභවො මහරට්‌ඨියො සො
බුද්‌ධඞ්‌කුරො භවි තදා ජටිලාභිධානො;()
සම්‌බොධියා’ධිගම පච්‌චයපත්‌ථනං සො
විරොවිධාය පදුමුත්‌තරපාදමූලෙ,
සඞ්‌ඝස්‌ස බුද්‌ධපමුඛස්‌ස තිචිවරානි
පාදාසි තීසුරතනෙසු අභිප්‌පසන්‌නො; ()
තස්‌සා’සි හංසවතිනාම පුරං ජිනස්‌ස
ආනන්‌දභුපති පිතා ජනිකා සුජාතා,
ද්‌වෙ තස්‌ස දෙවලසුජාතවසි වසිනං
අග්‌ගා භවිංසු සමණිස්‌වාමිතාසමා’ග්‌ගා; ()
ලක්‌ඛායුකො සජයබොධික විසාලසාල
රුක්‌ඛො උපට්‌ඨහි මුනිං සුමනාභිධානො,
තස්‌ස’ට්‌ඨ’සිතිරතනප්‌පමිතං සරීරං
ආසුං තයො භගවතො ගණසන්‌නිපාතා; ()
තස්‌සා’පරෙන සමයෙන සුමෙධනාමො
ලොකම්‌හි පාතුභවි ලොකහිතාය සත්‌ථා,
බුද්‌ධඞ්‌කුරො කිර තදාන්‍යු’භතො සුජාතො
ස්‌වා’සිතිකොටිවිභවො’ත්‌තර මාණවො’සි; ()
විස්‌සජ්‌ජියාන විභවං තම්‌සිතිකොටිං
දත්‌වාන දානමස්‌මං සුගතෙ සසඞ්‌ඝෙ,
පබ්‌බජ්‌ජිතො පරමබොධි මපත්‌ථයිත්‌ථ
බ්‍යාකාසි සොමුනි ත’මිජ්‌ඣනභාව’මද්‌ධා; ()
රම්‌මං සුදස්‌සනමහූ නගරං සුදන්‌තො
තස්‌සා’සි භූපති පිතා ජනනී සුදත්‌තා,
සඞ්‌ඝෙසු’හොසු සරණො වසි සබ්‌බකාමො
රාමා යමානි පරමාන්‍ය’භවුංක සුරාමා; ()
බොධී’පි නීපතරු සාගරනාමථෙරො
’පට්‌ඨාසි තං නවුතිවස්‌සසහස්‌සමායු,
තස්‌සා’ඪසිතිරතනු’ග්‌ගතමාසි ගත්‌තං
ආසුං තයො සතිමතො ගණසන්‌තිපාතා; ()
තස්‌සා’පරෙන සමයෙන ජනප්‌පදීපො
ජාතො සුජාතභගවා ජිතපඤ්‌චමාරො,
සම්‌පන්‌නසත්‌තරතතො වරචක්‌කවත්‌ති
රාජා බභූවි’හ මහාපුරිසො තදාසො; ()
ධම්‌මා’මතෙන මුදිතො රතනද්‌වයස්‌ස
දත්‌වා සසත්‌තරතනං චතුදීපරජ්‌ජං,
පබ්‌බජ්‌ජි බොධිපණිධිං පණිධාය ධීමා
ඤත්‌වා මහාමුනි තමිජ්‌ඣනභාවමාහ;
රම්‌මං සුමඞ්‌ගලමහූ පුරමුග්‌ගතාඛ්‍යො
රාජා පිතාභවි පභාවතිනාම මාතා,
අග්‌ගාභවිංසු ච සුදස්‌සනදෙවථෙරා
නාගා ගණස්‌සදසි නාගසමාලථෙරි; ()
තං නාරදොමුනිරු’පට්‌ඨහි ච’ත්‌තභාවො
පණ්‌ණාසහත්‌ථපමිතො භවිවෙණුබොධි,
තස්‌සා’භවී නවුතිවස්‌සසහස්‌සමායු
ආසුං තයො ධීතිමතො ගණසන්‌නිපාතා; ()
තස්‌සා’පරෙනි’හ නිරූපමරූපසාරො
ජාතොබභූව පියදස්‌සිසමන්‌තදස්‌සි,
ධීරො තදන්‍ය’භවි කස්‌සපමාණවො සො
වෙදෙසු තීසු කුසලො කුසලං ගවෙසි; ()
සො කොටිලක්‌ඛපරිමාණධතබ්‌බයෙන
සඞ්‌ගස්‌ස බුද්‌ධපමුඛස්‌ස මහාවිහාරං,
කත්‌වා පදාසි අභිපත්‌ථිතබුද්‌ධභාවො
බුද්‌ධො’පි තප්‌පණිධිසිද්‌ධි සියා’ත්‍ය’භාසි; ()
චන්‌දාමහෙසි ජනනී ජනකො පුදින්‌නො
රාජා බභූව පුරමස්‌ස අනොමනාමං,
ආසුං තදග්‌ගයුගලානි සුජාතධම්‌ම-
දින්‌නා ගණස්‌සදසි පකාලිතසබ්‌බදස්‌සි; ()
තං සොතව්‌හසමණො සමුපට්‌ඨහිත්‌ථ
බොධී පියඞ්‌ගු භගවා’සි අසිතිහත්‌ථො,
අට්‌ඨාසික සො නවුතිවස්‌සසහස්‌සම’ස්‌ස
ආසුං තයො මතිමතො ගණසන්‌නිපාතා; ()
තස්‌සා’පරෙන සමයෙනු’දපාදි ලොකෙ
ලොකත්‌ථසාධනරතො මුනිර’ත්‌ථදස්‌සී,
සත්‌තුන්‌තමො’පි නිරතික්‌කමධම්‌මසිමො
තෙජිද්‌ධිමා ඉසි තදා’සි සුසිමනාමො; ()
ආනීය දිබ්‌බභවනා කුසුමානි තස්‌ස
මන්‌දාරවානි සුපතිට්‌ඨිතපාදපීඨෙ,
සම්‌පූජියාන පණිධානමකාසි සත්‌ථා
ත්‌වං මාදිසො’බ්‍රුවි භවිස්‌සසි චා’යතින්‌ති; ()
තස්‌සා’සි සොභිතපුරං භවිසාගරව්‌හො
රාජා පිතා ජනතිදෙවි සුදස්‌සනාඛ්‍යා,
සන්‌තොපසන්‌තසමණා වරසාවකා’සුං
ධම්‌මා තදග්‌ගසමණිප්‍ය’භවුං සුධම්‌මා; ()
තඤ්‌චා’භයො මුනිරූපට්‌ඨහි සොප්‍ය’සීති-
හත්‌ථුග්‌ගතො සතසහස්‌සපමාණමායු,
චම්‌පෙය්‍යසාඛි භවි බොධි සුබොධිහෙතු
ආසුං තයො අරියසවකසන්‌නිතා; ()
තස්‌සා’පරෙන උදපාදි’හ ධම්‌මදස්‌සී
නිස්‌සීමධී’නධිවරො භවපාරදස්‌සි,
සො තාවතිංසභවතම්‌හි මහානුභාවො
බුද්‌ධඞ්‌කුරො භවි තදා කිර දෙවරාජා;()
දිබ්‌බානි ගන්‌ධකුසුමානි කථාගතස්‌ස
චක්‌කඞ්‌කිතොරුචරණම්‌බුරුහාසනම්‌හි,
පූජෙසි දිබ්‌බතුරියෙහි ච බුද්‌ධභාවං
සො පත්‌ථයං මුනිතමිජ්‌ඣ නභාවමාහ; ()
ඨානියමාසි සරණං සුගතස්‌ස තස්‌ස
රාජා පිතා’සි සරණො ජනනි සුනන්‌දා,
අග්‌ගාභවිංසු පදුමොවසි ඵුස්‌සදෙවො
ඛෙමා ච භික්‌ඛුසමණිස්‌ව’පි සබ්‌බනාමා; ()
ථෙරො සුනෙත්‌තවිසුතො තදුපට්‌ඨහි සො
ලක්‌ඛායුකො’සි ජයබොධි ඤ්‌ච බිම්‌බිජාලො,
තස්‌සා’ප්‍ය’සිතිරතනප්‌පමිතං සරීරං
ආසුං තයො අරියසාවකසන්‌නිපාතා; ()
තස්‌සා’පරෙන සමයෙනි’ග සිද්‌ධබොධි
සිද්‌ධත්‌ථනාමවිදිතො උදපාදි සත්‌ථා,
බුද්‌ධඞ්‌කුරො භවි තදා’ඛීලඞඣානලාභී
භොජි පවත්‌තිතඵලං වසි මඞ්‌ගලාඛ්‍යො; ()
සම්‌පන්‌නගන්‌ධරසිකං පරිපක්‌කමෙකං
ආනීය සො විපකුලජම්‌බුභලං වනම්‌හා,
පාදාසි තස්‌ස පණිධීකතබුද්‌ධභාවො
තඤ්‌චානුභුය භගවාපි වියාකරිත්‌ථ; ()
වෙහාරමාසි නගරං ජයසෙනනාමො
රාජා අහොසි ජනකො ජනනී සුඵස්‌සා
භික්‌ඛූසු තස්‌ස වසි සම්‌බහුලො සුමිත්‌තො
ද්‌වෙ සීවලි ඤ්‌ච සමණීසු වරා සුරාමා; ()
තං රෙවතොමුනි මුනින්‌දමුට්‌ඨහිත්‌ථ
බොධී’පි තස්‌ස කණිකාරමභීරුහො’සි,
ලක්‌ඛායුකො ස’නරසාරථි සට්‌ඨිහත්‌ථො
ආසුං තයො අරියසාවකසන්‌නිපාතා; ()
තස්‌සා’පරෙනි’හ සමුබ්‌භවි නිස්‌සනාමො
සත්‌ථා පසත්‌ථචරණො චතුරො’ඝතිණ්‌ණො,
බුද්‌ධඞ්‌කුරො භවි තදානි සුජාතරාජා
රාජඤ්‌ඤමොළිමණිලඞ්‌කතපාදපීඨො; ()
හිත්‌වා ස’රජ්‌ජමිසිවෙයධරො සුධීරො
දිබ්‌බෙහි’නෙකකුසුමෙහි ජිනං වජන්‌තං,
පූජෙසි මුද්‌ධනි තමාපවිතානසොභං
සත්‌ථා’පි තප්‌පණිධිසිද්‌ධි සියා’ත්‍ය’භාසි; ()
ඛෙමං පුරඤ්‌හි ජනකො ජනසන්‌ධනාමො
රාජා ජනෙත්‌ති පදුමා නිජසඞක්‌ඝමජ්‌ඣෙ,
ද්‌වෙ බ්‍රහ්‌මදෙවුදය විස්‌සුතථෙරනාගා
ඵුස්‌සා ච අග්‌ගයුගලාන්‍ය’භවුං සුදත්‌තා; ()
තං සම්‌භවොවසි වසින්‌දමුපට්‌ඨහිත්‌ථ
තස්‌සා’සනව්‌හතරු බොධි ස’සට්‌ඨිතත්‌ථො,
අට්‌ඨාසි වස්‌සගණනාය මහෙසි ලක්‌ඛං
ආසුං තයො අරියසාවකසන්‌නිපාතා; ()
තස්‌සා’පරෙන භවසාගරපාදස්‌සි
ඵුස්‌සො මහාමුනිරි’හකබ්‌භුදපාදි ලොකෙ,
ධීරො තදානි විජිතාවි ජිතාරිවග්‌ගො
රාජා බභූව සුරරාජනිභො’රුතෙජො; ()
සම්‌බොධි මග්‌ගපුරිසො පණීධාය ඵීතං
රජ්‌ජං විවජ්‌ජිය ස’පබ්‌බජිතො ජනස්‌ස,
අඤ්‌ඤාය තීණිපිටකානි කථෙසි ධම්‌මං
ව්‍යාකාසි ඵුස්‌සභගවා’පි’ව පුබ්‌බබුද්‌ධා; ()
තස්‌සා’සි කාසිනගරං ජයසෙනනාමො
රාජා පිතා’සි ජනති සිරිමා මහෙසි,
සඞ්‌ඝෙසු’භොසු’පි සුරක්‌ඛිතධම්‌මසෙතා
චාලා තදග්‌ගයුගලානි තථූ’පඤ්‌චාලා; ()
බොධිද්‌දුමා’මලකසාඛි සරීරමට්‌ඨ-
පණ්‌ණාසහත්‌ථපමිතං සභියාභිධානො,
සොපට්‌ඨහී නවුතිවස්‌සසහස්‌සමායු
ආසුං තයො භකවතො ගණසන්‌නිපාතා; ()
තස්‌සා’පරෙන සනරාමරසත්‌තසාරො
සත්‌ථා විපස්‌සි’හ සමුබ්‌භවි සබ්‌බදස්‌සී,
කම්‌මෙන කෙනචි මහිද්‌ධිමහානුභාවො
බුද්‌ධඞ්‌කුරො’භවි තදා’තුලනාගරාජා; ()
අඞ්‌ගීරසස්‌ස ඝනකඤ්‌චනහද්‌දපීඨං
පාදාසි තස්‌ස ඛවිතං රතනෙහි නානා,
සො බුද්‌ධභාවමහිපත්‌ථිය බොධිසත්‌තො
ව්‍යාකාසි තත්‌ථසුනිසජ්‌ජ ජිනො විපස්‌සි; ()
තස්‌සා’සි බන්‌ධුමතිනාමපුරං තදෙව-
නාමො පිතා ජනනි බන්‌ධුමතී මහෙසි,
ද්‌වෙ ඛණ්‌ඩතිස්‌සවසිනො වරසාවකා’සුං
චන්‌දා ච භද්‌දයුගලං භවි චන්‌දමිත්‌තා; ()
දෙහං අසිතිරතතං තමසොකථෙරො-
පට්‌ඨාසි බොධිවිටපී භවි කණ්‌හවණ්‌ටා,
වාසංඅකා මුනිර’සීතිසහස්‌සවස්‌සං
ආසුං තයො අරියසාවකසන්‌නිපාතා; ()
තස්‌සා’පරෙන අධිසීලසමාධිපඤ්‌ඤො
සත්‌ථා සමුබ්‌භවී සිඛී ජනකප්‌පසාඛී,
ධීරො තදා’භවි අරින්‌දමනාමරාජා
සද්‌ධො පහූතරතතො රතනත්‌තයම්‌හි; ()
භික්‌ඛඤ්‌ච සත්‌තරතනාභරණාභිරාමං
ඤත්‌වාන හත්‌ථිරතනං සුගතෙ සසඞ්‌ඝෙ,
සො බුද්‌ධභාවමහිපත්‌ථයි සත්‌තසාරො
ව්‍යාකාසි ලච්‌ඡසි සුඛොධිපදන්‌ති සත්‌ථා; ()
බුද්‌ධස්‌ස චාරිණ්‌වතී නගරං අහොසි
මාතා පභාවති පිතා අරුණව්‌හ රාජා,
සඞ්‌ඝෙසු’භොසු අභිභුවසි සම්‌භවො ච
අග්‌ගාභවිංසු මඛිලාපදුමාභිධානා; ()
ඛෙමඞ්‌කරො ජිනමුපට්‌ඨහි සත්‌තතිංස-
හත්‌ථුච්‌ඡිතො විජයබොධි ච පුණ්‌ඩරිකො,
සො සත්‌තතිංසතිසහස්‌ස මිතායුකො’සි
ආසුං තයො තදියසාවකසන්‌නිපාතා; ()
තස්‌සා’පරෙනි’හ සමුබ්‌භවි කෙතුමාලා-
බ්‍යාමප්‌පභාපරිලසං මුනිවෙස්‌සභූ’ති,
බුද්‌ධඞ්‌කුරො කිර තදානි සුදස්‌සනව්‌හ-
රාජා බභූව පරරාජගජින්‌දසීහො; ()
සඞ්‌ඝස්‌ස බුද්‌ධපමුඛස්‌ස සචීවරං සො
දත්‌වාන දානමතුලං ජිනසාසනම්‌හි,
සබ්‌බඤ්‌ඤුබොධිමභිපත්‌ථිය පබ්‌බජිත්‌ථ
බුද්‌ධො භවිස්‌සසි ධුවන්‌ති තමාහසත්‌ථා; ()
තස්‌සා’ප්‍ය’නොපමපුරං භවි සුප්‌පතීතො
රාජා පිතා යසවතී ජනිකා මහෙසී,
සොණුත්‌තරා ච නිජසාවකසාවිකානං
දාමා මතිද්‌ධිපරමා පරමා සමාලා; ()
බොධී’පි තස්‌ස භවි සාලමහීරූහො’ප-
සම්‌පන්‌නභික්‌ඛු තදුපට්‌ඨහි සට්‌ඨිහත්‌ථො,
සත්‌ථා විහාසි සමසට්‌ඨිසහස්‌සවස්‌සං
ආසුං තයො තදියසාවකසත්‌තිපාතා; ()
තස්‌සා’පරෙනි’කහ සමුබ්‌භවි සච්‌චසන්‌දො
වෙනෙය්‍යබන්‌ධු භගවා කකුසන්‌ධනාමො,
බුද්‌ධඞ්‌කුරො භුවි තදා’භවි ඛෙමරාජා
දානප්‌පබන්‌ධජලසෙකසුධොතහත්‌ථො; ()
සො පත්‌තචීවරපභූතිකමන්‌නපානං
දත්‌වා සසාවකජිනස්‌ස ඝරා’භිගන්‌ත්‌වා,
පබ්‌බජ්‌ජි බොධිපණිධිං පණිධාය රාජා
සත්‌ථාසයා’ත්‍ය’වච තප්‌පණිධානසිද්‌ධි; ()
ඛෙමවහයං නගරමස්‌ස පිතා’ග්‌ගිදත්‌තො
විප්‌පො විභාවි අභවි ජනිකා විසාඛා,
සඤ්‌ජිවථෙරදුතියො විධුරො ච ථෙරො
සාමා තදග්‌ගයුගලං භවි චම්‌පකාඛ්‍යා; ()
තං බුද්‌ධිජො ජිනමුපට්‌ඨහි තස්‌ස ගත්‌තං
තාළිසහත්‌ථමිතමාසි සිරිසබොධි,
තාළිසහායනසහස්‌සපමාණමායු
එකො’ව තස්‌ස භවි සාවකසන්‌නිපාතො; ()
තස්‌සා’පරම්‌හි සමයෙ කරුණානිධානො
ලොකාභිභූ කනකභුධරහාරිරූපො,
උප්‌පජ්‌ජි කොණගමනොමුනි පබ්‌බතාඛ්‍යො
භුමිස්‌සරො භවි මහාපුරිසො තදානි; ()
සඞ්‌ඝස්‌ස බුද්‌ධපමුඛස්‌ස උළාරදානං
දත්‌වා මහග්‌ඝවරචිවරසාටකෙ ච,
සො පකබ්‌බජිත්‌ථ අභිපත්‌ථිත බුද්‌ධභාවො
බුද්‌ධො භවිස්‌සසි තුවන්‌ති තමාහසත්‌ථා; ()
නාමෙන සොභවති තම්‌පුරමුත්‌තරාඛ්‍යා
මාතා පිතා’වනිසුරො භවි යඤ්‌ඤදත්‌තො,
හීයොසොත්‌තරවසී සමණි සමුද්‌දා
තස්‌සො’ත්‌තරා ච පරමා පරිසාසු’භොසු; ()
තං සොත්‌ථිජො ජිනමුපට්‌ඨහි තිංසහත්‌ථො
අඞ්‌ගීරසො භවි උදුම්‌බරසාඛි බොධි,
සො තිංසහායනසහස්‌සමිතායුකො’සි
එකො’ව තස්‌ස භවි සාවකසන්‌තිපාතො; ()
තස්‌සා’පරෙනි’හ මහාමුනි කස්‌සපාඛ්‍යො
ලොකම්‌හි පාතුභවි ඛග්‌ගවිසාණකප්‌පො,
බුද්‌ධඞ්‌කුරො භුවි තදා’භවි ජොතිපාලො
වෙදෙසු තීසු සකලාසු කලාසු ඡෙකො; ()
කල්‍යාණමිත්‌තදුතියො සුගතං උපෙච්‌ච
සුත්‌වාන ධම්‌මමථසාසන මොතරිත්‌වා,
සබ්‌බඤ්‌ඤුභාවම්‌හිපත්‌ථයි මාණවො සො
ව්‍යාකාසි කස්‌සපමුනී’පි මුනී’ච පුබ්‌බා; ()
බාරාණසි නගරමාසි පිතා ච මාතා
ද්‌වෙ බ්‍රහ්‌මදත්‌තධනවත්‍ය’භිධානවන්‌තො,
භික්‌ඛුසු තස්‌ස සමණිස්‌ව’පි තිස්‌සභාර-
ද්‌වාජා ච භද්‌දයුගලාත්‍ය’නුලොරුවෙලා; ()
තං සබ්‌බමිත්‌තසමණො සමුපට්‌ඨහිත්‌ථ
නිග්‍රොධසාඛී ජයබොධි ස’වීසහත්‌ථො,
තස්‌සා’සි විසතිසහස්‌ස පමාණමායු
එකො’ව’හූ අරියසාවකසන්‌නීපාතො; ()
ඉති මෙධානන්‌දාභිධානෙන යතිතා විරචිතෙ සකලකවිජන හදයානන්‌ද දානනිදානෙ ජිනවංසදීපෙ දූරෙනිදානෙ බොධිසත්‌තස්‌ස සෙසපණිධාතට්‌ඨපන පවත්‌ති පරිදීපො තතියො සග්‌ගො.
දීපඞ්‌කරාදිචතුවීසති බුද්‌ධපාද-
මූලෙසු ලඞපණිධාන මහානිධානො,
ලක්‌ඛාධිකං චතුරසඞ්‌ඛියකපක්‌පසඞ්‌ඛං
පුඤ්‌ඤාභිසන්‌දමභිසඞ්‌ඛරි බොධිසත්‌තො; ()
එත්‌ථන්‌තරෙ විවිධබාහිරවත්‌ථුජාතං
සිස’ක්‌ඛිමංසරුධිරානි ච පුත්‌තදාරෙ,
සො ජිවිතම්‌පි කපණඩිකයාචකානං
වීරො පරිච්‌චජි පජාය හිතත්‌ථමෙව; ()
දානාධිමුත්‌තිපරියෙසන විප්‌පවෙසො
පත්‌වා තපොවනමකිත්‌ති තපොධනස්‌ස,
තිහං අලත්‌ථ සකටාහමලොණඩාකං
යස්‌සා’භිභූතජඨරස්‌ස ජිඝච්‌ඡිතත්‌තා; () (අකිත්‌තිචරියං)
කන්‌තාරමග්‌ග පටිපන්‌න මනාතපත්‌තං
පච්‌චෙක බුද්‌ධමහිපස්‌සිය සඞක්‌ඛවිප්‌පො,
ඵුට්‌ඨං සකිච්‌චපසුතො සූරියාතපෙන
යො ඡත්‌තුපාහණමදාසි සුධොතපාණි; () (සඞ්‌ඛචරියං)
දුබ්‌භික්‌ඛපීළනභයෙන කලිඞ්‌ගරට්‌ඨා
සංයාචතං යදුපගම්‌ම ධනඤ්‌ජයව්‌හො,
සොණ්‌ඩාය ගය්‌හ නිජමඤ්‌ජන නාගරාජං
යො දක්‌ඛිණොදක නිසෙකමකාසි රාජා; () (කුරුධම්‌මචරියං)
හුත්‌වාන යො මහසුදස්‌සන චක්‌කවත්‌තී
රාජා කුසාවතිපුරම්‌හි දිවා ච රත්‌තො,
වත්‌ථත්‌තපානමුපතෙසි චරාපයිත්‌වා
භෙරිංක අසෙසකපණ්‌ඩිකයාචකානං; () (මහාසුදස්‌සනචරියං)
යො සත්‌තභුමිභුජසාසි පුරොහිතො’පි
රාජූහි ලද්‌ධමඛිලං ධනධඤ්‌ඤරාසිං,
සම්‌පත්‌තයාචකජනස්‌ස පරිච්‌ඡජිත්‌වා
පුඤ්‌ඤප්‌පබන්‌ධමභිසඤ්‌චිනි බොධිහෙතු; () (මහාගොවින්‌දචරියං)
ධම්‌මානුසාසි නිමිනාම මහීභුජො’පි
සාලං විධාය මිථිලාය චතුම්‌මුඛං යො,
අච්‌ඡින්‌නමත්‌ථිජනපක්‌ඛිචතුප්‌පදානං
දානං පවත්‌තයී පුරා දදතං වරිට්‌ඨො; () (නිමිරාජචරියං)
යො එකරාජසුතචන්‌දකුමාරභූතො
මුද්‌ධාභිසෙක කරණාය ජනෙහි ගච්‌ඡං,
සංවෙජිතො සවිභවෙ තිභවෙ’පි යඤ්‌ඤා-
වාටං විධාය’භිපවත්‌තයි දානවට්‌ටං; () (චන්‌දකුමාරචරියං)
යො වත්‌ථුසාරගහණෙන අතිත්‌තරූපො
භුමිස්‌සරො’පි සිවිනාම සුරාධිපස්‌ස,
ජච්‌චන්‌ධවෙසගහිතස්‌ස විලොචනානි
උප්‌පාටයිත්‌ව පදදං ලභි දිබ්‌බචක්‌ඛූ; () (සිවිරාජචරියං;)
දානාධිමුත්‌තිපරමො සසපණ්‌ඩිතො යො
මිත්‌තෙනු සාසිය අධිට්‌ඨිතුපොසථඞ්‌ගො,
අඞ්‌ගාරමුද්‌ධනි පපාත සජීවිතාසං
හිත්‌වා ද්‌විජස්‌ස තනුමංසපදාතුකාමො; () (සසපණ්‌ඩිතචරියං; ඉතිදානපාරමීං)
යො මාතුපොසකකරි භිසමුද්‌ධරත්‌තො
අන්‌ධාය හත්‌ථිදමකෙන කරෙණුකාය,
සොණ්‌ඩාය සුට්‌ඨුගහිතො’ප්‍ය’විකණ්‌ඩිතස්‌ස
සීලස්‌ස ඛණ්‌ඩනභයා නජනෙසි කොපං; () (මාතුපොසකචරියං)
යො භුරිදත්‌තභුජගො’පරිවම්‌මිකට්‌ඨො,
සීලබ්‌බතං විසධරො සමධිට්‌ඨහිත්‌වා,
පෙළාය ඛිත්‌තභුජගෙ අහිගුණ්‌ඨිකම්‌හි
සීලස්‌ස කුප්‌පනභයෙන ජහාසි කොපං; () (භුරිදත්‌තචරියං;)
සීලබ්‌බතාදිවිභවො ජලිතිද්‌ධිමා යො
චම්‌පෙය්‍යනාමභුජගො අහිගුණ්‌ඨිකම්‌හි,
ඉච්‌ඡානුරූපවිචරො චමරී’ව වාලං
සීලං ජුගොප නපි තබ්‌බධකෙ චුකොප; () (චම්‌පෙය්‍යචරියං;)
යො චූලබොධිවිසුතො සමදිට්‌ඨහත්‌වා
සීලබ්‌බතං වනමුපෙච්‌ච වසං පියාය,
තායං පසය්‌හ ගහිතාය’පි කාසිරඤ්‌ඤා
සීලබ්‌බිසොධනපරො පජහිත්‌ථ රොසං; () (චූලබොධිචරියං)
යො භිංසරූපි මහිසො’පි වලිමුඛස්‌ස
ආගුං තිතික්‌ඛමඛීලං පරිසුද්‌ධසිලො,
රුක්‌ඛට්‌ඨයක්‌ඛවචනානි පටික්‌ඛිපිත්‌වා
තං සීලභඞ්‌ගභයතො භයතො මුමොච; ()
යො වුය්‌හමානමපනීය නදීපවාහා
මිත්‌තද්‌දුහිං පුතසජීවිතදානහෙතු,
රඤ්‌ඤා මුමොච වධියං අවිකොපනෙන
සීලස්‌ස රූරුහරිණො’පි හරිස්‌සවණ්‌ණො, () (රූරුමිගරාජචරියං;)
යො දන්‌තකට්‌ඨසකලෙහි ජටාකුලෙහි
කුද්‌ධෙන කුටජටිලෙන කතාහිසාපො,
මාතඞක්‌ගනාමමුනි සීලධනං ජුගොප
සම්‌පාතසාපරිපුමිද්‌ධිබලෙන රක්‌ඛං; () (මාතඞ්‌ගචරියං;)
මග්‌ගාවතිණ්‌ණමධමං කල්‌හාභීලාසා-
සඞ්‌ඝට්‌ටිතොභයරථඞ්‌ගමධම්‌මයක්‌ඛං,
කොපග්‌ගිනා නපරිඣාපයමිද්‌ධිමා යො
සීලං රරක්‌ඛ ඛලු ධම්‌මිකයක්‌ඛරාජා; () (ධම්‌මාධම්‌ම දෙවපුත්‌තචරියං;)
යො පොරිසාදවසගස්‌ස ජයද්‌දිසස්‌ස
රඤ්‌ඤො පටිඤ්‌ඤමධිකිච්‌ච විජිවිතාසො,
ඛීත්‌තායුධො තදුපගම්‌ම අලීනසත්‌තො
යක්‌ඛං දමෙසි නනු සීලවතං නිදානා; () (අලීනසත්‌තචරියං;)
යො සඞ්‌ඛපාලභුජගො නිජභොගපූර-
ව්‍යාභඞ්‌ගිභාරතරවාහිති භොජපුත්‌තෙ,
කාරුඤ්‌ඤමාප අභිගන්‌තුමපාදතාය
සීලස්‌ස භඞ්‌ගභයතො’පි හුතාසතෙජො; () (සඞ්‌ඛපාලචරියං; ඉති සීලපාරමිං;)
සඞ්‌ඛාරධම්‌මඛණභඞ්‌ගසභාවදස්‌සි
උස්‌සාවබින්‌දුවිලයං’ව යුධඤ්‌ජයො යො,
රාජා ජනස්‌ස රුදතො පවිහාය රජ්‌ජං
නෙක්‌ඛම්‌මපාරමිමපුරයි පබ්‌බජිත්‌වා; () (යුධඤ්‌ජය චරියං;)
යො සොමනස්‌සවිසුතො කුරුරාජපුත්‌තො
දුස්‌සීලකුටජටිලබ්‌බචනං පටිච්‌ච,
රඤ්‌ඤා නියොජිතවධො වධකාවකාසං
ලද්‌ධානුසාසිය’භිනික්‌ඛමි චත්‌තරජ්‌ජො; () (සොමනස්‌ස චරියං;)
යො කාසිරාජතනුජො’පි අයොඝරාඛ්‍යො
ඊහං භතො චිරමයොඝරවාසහීරූ,
රජ්‌ජං පහාය පරමං පිතරා පදත්‌තං
නෙක්‌ඛම්‌මපාරමිපරො වනමොතරිත්‌ථ; () (අයොඝරචරියං;)
යො පඤ්‌චකාමගුණදීපනතො’පදිට්‌ඨ-
සම්‌භත්‌තමිත්‌තවචනම්‌පි පටික්‌ඛිපිත්‌වා,
නිද්‌ධන්‌තකඤ්‌චනනිභච්‌ඡවි කඤ්‌චනාඛ්‍යො
පත්‌වා තපොවනමපබ්‌බජි බන්‌ධවෙහි; () (භිසචරියං;)
පක්‌ඛිත්‌තදද්‌දුලනහාරුරිවා’නලම්‌හි
සඞ්‌ඛාරධම්‌මවිසයෙ පටිවට්‌ටිතත්‌තො,
යො සොණභුසුරසුධී විභවං පහාය
පබ්‌බජ්‌ජිතුං සපරිසො පවනං ජගාම; () (සොණපණ්‌ඩිතචරියං; ඉති නෙක්‌ඛම්‌ම පාරමි;)
යො සෙණකො සුධි පසිබ්‌බකගබ්‌භසායිං
විප්‌පස්‌සි මොහකලුසිකතමානසස්‌ස,
සප්‌පං සුඝොරමුපදස්‌සිය දීඝදස්‌සී
පඤ්‌ඤාසුපාරමිමපූරයි භුරිමෙධො; () (සෙණකපණ්‌ඩිත චරියං;)
යො යං මහොසධසමාඛ්‍යසුධී සුධීසො
උම්‌මග්‌ගසංවුතනිසග්‌ගවතිසමො’පි,
උම්‌මග්‌ගතො’ව සබලං මිථිලාධිනාථං
පඤ්‌ඤාපජාපතිපති රිපුතො මුමොච; () (මහොසධචරියං ඉති පඤ්‌ඤා පාරමී;)
වාලෙනු’ළාරවීරියො වීරියෙන ඝොරං
සංසාරදුක්‌ඛමිව යො කිසකාලකො’පි,
ගම්‌භීරසාගරජලං සපජානුකම්‌පී
උස්‌සිඤ්‌චිතුං සතතමාරහි සත්‌තසාරො; () (කාලක චරියං)
රාජාමහාදිජනකො ජනකුන්‌දචන්‌දො
ගම්‌භීරභුරිසලිලං සලිලාකරං යො,
සූරො’රුබාහුවීරියො වීරියං තතාර
සංසාරසින්‌ධුතරණෙ තරණීසරූපො; () (මහාජනකචරියං; ඉති වීරියපාරමි;)
යො ඛන්‌තිතින්‌තහදයො යතිඛන්‌තිවාදී
ඡෙදාපිතෙ’පි සකලං සකලත්‌තභාවෙ,
සමපූතඛන්‌තිජලමෙවභූසං සිසෙච
ව්‍යාපාදපාවකපදිත්‌තකලාබුරාජෙ; () (ඛන්‌තිවාදී චරියං)
යො ධම්‌මපාලනපරො සුසු ධම්‌මපාලො
කාරාපිතෙ’පි වධකෙහ’සිමාලකම්‌මං,
ආසන්‌නතාපනිරයම්‌හි පතාපරාජෙ
ඛන්‌තිං පවත්‌තයි මනප්‌පිතඛන්‌තිමෙත්‌තො; () (ධම්‌මපාල චරියං; ඉති ඛන්‌තිපාරමී;)
යො අන්‌තරීපගභයංකරසුංසුමාර-
මුද්‌ධාසමප්‌පිතපදො කපිරාජභූතො,
දින්‌නං පටිඤ්‌ඤමනුකුබ්‌බමනඤ්‌ඤලබ්‌භං
නජ්‌ජා පපාත පරතීරමසච්‌චභීරූ; () (කපිරාජ චරියං)
යො සච්‌චපාරමිපරො වසි පච්‌චනාමො
සච්‌චෙන සච්‌චමහීසන්‌ධිය සච්‌චදස්‌සී,
පොරිං සමග්‌ගකරණිං සිරිජම්‌බුදීපෙ
සම්‌පාලයං සකලලොකමවොච වාචං; () (සච්‌චසව්‌භය චරියං;)
යො වට්‌ටපොතකදිජො අවිරූළ්‌හපක්‌ඛ-
පාදො’තිඛුද්‌දකකුලාවකගබ්‌භසායී,
සච්‌චෙන සොළසකරිසමිතප්‌පදෙසෙ
දාවග්‌ගිනිබ්‌බුතිමකා ථිරමායුගන්‌තං; () (වට්‌ටපොතක චරියං;)
යො ගිජ්‌ඣකාකබකබාණකභක්‌ඛභුත-
බන්‌ධු නිදාඝරවිතාපපරික්‌ඛයා’පෙ,
රිත්‌තෙ සරම්‌හි පරිමොචයි මච්‌ඡරාජා
සච්‌චෙන’කාලජලදාගමපච්‌චයෙන; () (මච්‌ඡරාජ චරියං;)
දුට්‌ඨාහිදට්‌ඨවිසවෙගවිමුච්‌ඡිතං යො
මණ්‌ඩබ්‌බතාපසවරො’රසයඤ්‌ඤදත්‌තං,
කත්‌වාන සච්‌චකිරියං කරුණාය කණ්‌හ-
දීපායනො මුනි මුමොච තමාපදම්‌හා; () (කණ්‌හාදීපායන චරියං;)
යො පොරිසාදවසගො සුතසොමරාජා
රජ්‌ජෙ තියොජනසතෙ සකජීවිතෙ’පි,
සච්‌චං රරක්‌ඛ නනු සච්‌චපරො නිරාසො
දින්‌නං පටිස්‌සවමුභින්‌නමපානුකුබ්‌බං; () (සුතසොමචරියං; ඉති සච්‌චපාරමී;)
නිබ්‌බින්‌නරජ්‌ජවිභවො භවභීරූතාය
යො මූගපක්‌ඛබධිරාකති මූගපක්‌ඛො,
නීතෙ නිඛාතුමපකි සීවථිකාවකාසෙ
දළ්‌හං අධිට්‌ඨිතවතං වත නොජහාසි; () (තෙමියචරියං; ඉති අධිට්‌ඨාන පාරමී;)
මෙත්‌තවිහාරපරමො පිතුරන්‌ධයට්‌ඨි
යො සොමසොම්‌මයදයො’පි සුවණ්‌ණසාමො,
වාළෙහි සම්‌පරිවුතො පවනෙ විහාරි
මෙත්‌තාඛ්‍යපාරමිමපූරයි පාපභීරූ; () (සුවණ්‌ණසාමචරියං;)
යො එකරාජවිසුතො භුවි කාසිරාජා
මෙත්‌තාකලත්‌තදුතියො සකජීවිතෙ’පි,
අවඡින්‌නරජ්‌ජවිභාවෙ පටිපක්‌ඛරාජෙ
මෙත්‌තාය සම්‌ඵරි සමං පරිභාවිතාය; () (එකරාජචරියං; ඉති මෙත්‌තා පාරමී;)
යා ලොමෙහංසවිසුතො’පි තුලාසරික්‌ඛො
මානාවමානනකරෙසු සුඛෙ ච දුක්‌ඛ,
වාසං චවට්‌ඨිපරිකිණ්‌ණසුසානමජ්‌ඣෙ
වෙරං අවෙරමනුපෙච්‌ච රරක්‌ඛු’පෙක්‌ඛං; () (ලොමහංසචරියං; ඉති උපෙක්‌ඛාක පකාරමිං)
සො බොධියා’භිනියතො පරිපක්‌කඤාණො
බුද්‌ධඞ්‌කුරො’පචිතපාරමිතාබලෙන,
නිජ්‌ඣාමතණ්‌හ’සිතකඤ්‌ජක්‌ඛුප්‌පිපාස-
ලොකන්‌තරොරුනිරයෙසු න ජාතු ජාතො; ()
නාලත්‌ථ පණ්‌ඩකනපුංසකමූගපක්‌ඛ-
ඡච්‌චන්‌ධජාතිබධිරිත්‌ථිජළත්‌තභාවං,
සො මක්‌ඛිකාමකසකුත්‌ථකිපිල්‌ලිකාදි-
ජාත්‍යා නපාතුභවි කීටපටඞක්‌ගජාත්‍යා; ()
නාලත්‌ථ ගන්‌ධගජතො පුථුලත්‌ත භාවං
නාලත්‌ථ වට්‌ටසුසුකා සුඛුමන්‌ත භාවං,
නාලත්‌ථ උම්‌දනමම්‌මනකත්‌ත භාවං
නාලත්‌ථ එවමතිහීනතරත්‌ත භාවං;
නාහොසි මාතුවධකො පිතුඝාතකො වා
නාහොසි සඞ්‌ඝභිදුරො අරහන්‌තඝාතො,
නාහොසි දුට්‌ඨහදයෙන තථාගතස්‌ස
නාහොසි සංජනනකො රුධිරස්‌ස කායෙ; ()
කම්‌මං ඵඛලං තදුභයං පටිබාහිනො යෙ
උච්‌ඡෙදදිට්‌ඨිගතිකා විහරිංසු තෙසං,
ලද්‌ධිං කදාචි නපරාමසි සද්‌දහානො
කම්‌මං ඵලං නියතබොධිපරායණො සො; ()
යස්‌මිං භවෙ භවති නාමචතුක්‌කමත්‌තං
තත්‍රා’පි පුඤ්‌ඤකරණත්‌ථ මසඤ්‌ඤසත්‌තෙ,
අට්‌ඨානතො නපටිසන්‌ධිමගණ්‌හි සුද්‌ධා-
වාසෙසු පඤ්‌චසු කදාචි පපඤ්‌චභීරූ; ()
බුද්‌ධඞ්‌කුරො නියතබොධිපදො කදාචි
දීඝායුකෙසු’පිභවෙසු සුඛානපෙඛො,
කත්‌වා’ධිමුත්‌තිවචනං ඉධ ජීවලොකෙ
නිබ්‌බත්‌ති සො තිදසපාරමිපූරණත්‌ථං; ()
ඉච්‌චෙවං සො පුරිසනිසභො දුප්‌පවෙසස්‌ස බොධි-
පාසාදස්‌සා’වතරණසමත්‌තිංසතිස්‌සෙණිරූපං,
නිප්‌ඵාදෙන්‌තො පරහිතරතො පාරමීධම්‌මජාතං
සංසාරෙ සංසරි චිරතරං ඝොරදුක්‌ඛං තිතික්‌ඛං; ()
ඉති මෙධානන්‌දාභිධානෙන යතිනා විරචිතෙ සකලකවිජන හදයානන්‌ද දානනිදානෙ ජිනවංසදීපෙ දුරෙනිදානෙ පාරමිධම්‌මාභිසඞ්‌ඛරණ පවත්‌ති පරිදීපො චතුත්‌ථො සග්‌ගො.
අත්‌ථවත්‌තපදං නානාවණ්‌ණමණ්‌ණවජාන්‌විතං,
පත්‌ථ්‍යාවත්‌තමිවාහොසි ජෙතුත්‌තරපුරං පුරෙ; () (සිලෙස බන්‌ධනං;)
පරිඛාමෙඛලාදාම බද්‌ධපාකාරසොණිනී,
රරාජ රාජධානී සා වධූව පතිමණ්‌ඩිතා; ()
මණිසිඞ්‌ගංසුමාලාභි බාලංසුමාලිවිබ්‌භමං,
සසඞ්‌කමණ්‌ඩලං තස්‌මිං පලම්‌හෙසා’භීසාරිකා; ()
ඉන්‌දිරාමන්‌දිරා’මන්‌දමණිමන්‌දිරසාලිනී,
හෙමද්‌ධජාවලි තස්‌මිං කිළාපයි කලාපිනො; ()
රරාජ නාගරාජානං කප්‌පිතාභරණෙහි ච,
දාඨාහි දානධාරාහි මෙඝවච්‌ඡන්‌තා’ව සා පුරී; ()
තුරඞ්‌ගනිකරොණ්‌ඩුතධුලිධූසරිතම්‌බරං,
නිවාරිතාතපංරඞ්‌ගවිතානස්‌සිරිමාහරි; ()
නීලසෙවාලධම්‌මිල්‌ලා සම්‌ඵුල්‌ලකමලා’නනා,
තහිමුප්‌පලලොල’ක්‌ඛී හංසපීනපයොධරා; ()
කිඤ්‌ජක්‌ඛරාජිරසානාරුද්‌ධරොධනිතම්‌බිනී,
භිඞ්‌ගාලිමණිමඤ්‌ජිරා නාරී’වා’සුං සරොජිනී; () (සිලෙස බන්‌ධනං;)
කෙවකලං කප්‌පරුක්‌ඛෙහි විනා සා රාජධාන්‍ය’හු,
විසාණාරාජධානී’ව සබ්‌බසම්‌පත්‌තිසාලිනී; ()
කදාචි පුරිසාජඤ්‌ඤො රාජා’හොසි පුරෙ තහිං,
වෙස්‌සන්‌තරො’තිනාමෙන විස්‌සුතො භුවනත්‌තයෙ; ()
කුමාරො’ව සමානො සො දානකීළාපරායණො,
කායූපගානි ධාතීනං රතනාභරණානි’පි; ()
ඛණ්‌ඩාඛණ්‌ඩං කරිත්‌වාන නවක්‌ඛන්‌තුං කපරිච්‌චජි,
එවං බාහිරවත්‌ථූනිදදන්‌තො අට්‌ඨවස්‌සිකො; ()
පාසාදමභිරීහිත්‌වා සොනිසජ්‌ජා’භියාචනං,
දස්‌සාමී’ති විචින්‌තෙසි සිසක්‌ඛිමංසලොහිතං; ()
සුඛෙධිතො මහාසත්‌තො සුක්‌කපක්‌ඛෙ’ව චන්‌දිමා,
පාලෙසි දසධම්‌මෙන පත්‌වා රජ්‌ජසිරිං පජං; ()
නිසජ්‌ජො පරිපාසාදෙ සො රාජා එකදා රහො,
කාමානං සඞක්‌කිලෙසඤ්‌ච වොකාරාදීනවං සරි; ()
පබ්‌බජ්‌ජාහිරතො රාජා නිබ්‌බින්‌තො විභවෙභවෙ,
සම්‌පත්‌තිසාරමාදාය හිත්‌වා රජ්‌ජසිරිං වරං; ()
මත්‌තමාතඞක්‌ගරාජා’ව අග්‌ගිපජ්‌ජලකානනා,
රුදතො ඤාතිසඞක්‌ඝස්‌ස අගාරස්‌මා’භි නික්‌ඛමී; ()
චම්‌පකාසොකවකුලතරුසණ්‌ඩසුමණ්‌ඩිතං,
සිඛණ්‌ඩිමණ්‌ඩලාඛණ්‌ඩකීළං කොකිලකූජනං; ()
අනෙකමිගපක්‌ඛීනමාසයං සලිලාසයං,
වීකාසකුසුමාමොදප්‌පවාසිතසමීරණං; ()
මධුමත්‌තා’ලිඞ්‌ධඞ්‌කාරනිබ්‌භර’ම්‌බුරුහාකරං,
සම්‌පාතනිජ්‌ඣරා’රාවගම්‌භීරභුරිභූධරං; ()
පවවෙකක්‌ඛමං වඞ්‌කපබ්‌භාරං ගිරිගබ්‌භරං,
දුප්‌පවෙසපකථං වඞ්‌කගිරිනාමතපොවනං; ()
පත්‌වා ලද්‌ධෙ’සිපබ්‌බජ්‌ජා කවිලාසො සො මහීභුජො,
චරන්‌තො බ්‍රහ්‌මචරියං චිරස්‌සං වීතිනාමයි; ()
තස්‌සරඤ්‌ඤො මහෙසිපි මද්‌දීනාම සුඛෙධිතා,
පුත්‌තධීතූභිසද්‌ධිං තං තපොවනමුපාවිසි; ()
මහිච්‌ඡො පූජකොවිප්‌පො තදා බීගච්‌ඡදස්‌සනො,
යෙන වෙස්‌සන්‌තරොසත්‌තසාරො තෙනුපසඞ්‌කමි; ()
අත්‌ථො කම්‌මකරෙහී’ති ජරාජජ්‌ජරිතස්‌ස මෙ,
පුත්‌තඤ්‌චධීතරං යාචී ධීරං පත්‌වා දයාපරං; ()
උභො කණ්‌හාජිනං ජාලිං සසෙනහභාරභාජනං,
සම්‌මාසම්‌බොධිකාමො සො තණ්‌හාදාසබ්‍යමුත්‌තියා; ()
දක්‌ඛිණොදකසම්‌පුතජූජක’ඤ්‌ජලිභාජනෙ,
සමප්‌පයිත්‌ථ බන්‌ධිත්‌වා අගමා’දාය නිද්‌දයො; ()
දානාධිමුත්‌තීවීමංසී විප්‌පාකප්‌පෙනු’පාගතො,
සංයාචි දෙවරාජා’ථ මද්‌දිදෙවිං පතිබ්‌බතං; ()
දක්‌ඛිණොදකනිද්‌ධොතහත්‌ථො සො දක්‌ඛිණොදකං,
කත්‌වා දෙවෙසවිප්‌පස්‌ස දෙවිං දෙවො පරිච්‌චජි; ()
සත්‌තක්‌ඛත්‌තුං පකම්‌පිත්‌ථ තස්‌ස පාරමිතෙජසා,
සාධුසාධූති පත්‌තානුමොදන්‌තී’ව මහීවධූ; ()
ඉච්‌චෙවං පුරිසාරඤ්‌ඤො පරිපාචිනපාරමී,
මණිරංසිස්‌මුජ්‌ජොත පාසාදසතලඞ්‌කතෙ; ()
මන්‌දමන්‌දානිලොණ්‌ඩූත පඤ්‌චවණ්‌ණද්‌ධජාලීනං,
මණිකිංකිණිජාලානුරාවසොතරසායනෙ; ()
දිබ්‌බෙහි නච්‌චගීතෙහි වාදිතෙහි මනොරමෙ,
කන්‌දප්‌පමණ්‌ඩපාකාර රඞ්‌ගමණ්‌ඩපමණ්‌ඩිතෙ; ()
දිබ්‌බන්‌තදිබ්‌බරාජූනං ඉන්‌දචාපසතෙහි’ව,
චූළාමණීමරීචිහී සම්‌බාධීකළිත’ම්‌බරෙ; ()
අච්‌ඡරාහි කුචඤ්‌චන්‌දනමිතඞ්‌ගීහි දූරතො,
විධූතචන්‌දිකාරාජි චාරුචාමර මාරුතෙ; ()
සුත්‌තප්‌පබුද්‌ධපොසො’ව තුසිතෙ තිදසාලයෙ,
තතො චවිත්‌වා නිබ්‌බත්‌ති හුත්‌වා සන්‌තුසිත’ව්‌හයො; ()
දිබ්‌බෙසු පඤ්‌චකාමෙසු වසන්‌තො තුසිතාලයෙ,
පඤ්‌චින්‌ද්‍රියානි ලොකෙකලොචනො පරිචාරයි; ()
තදා දසසහස්‌සෙසු චක්‌කවාළෙසු දෙවතා,
එකත්‌ථ සන්‌නිපතිතා සුත්‌වා බුද්‌ධහළාහළං; ()
තෙනො’පසඞ්‌කමිත්‌වාන යෙනා’සි පුරිසුත්‌තමො,
කත්‌වා තබ්‌බදනම්‌භොජං නයනාලිකුලාලයං; ()
චූළාමණිමයුඛම්‌බුතිද්‌ධොතචරණාසනෙ,
බද්‌ධඤ්‌ජලිපුටම්‌භොජමකුලාති සමප්‌පයුං; ()
චක්‌කවත්‌තිපදං සක්‌කමාරබ්‍රහ්‌මපදතයා,
නඛො මාරිස පත්‌ථෙත්‌වා පාරමී පරිපාචිතා; ()
වෙනෙය්‍යබන්‌ධුභුතෙන සම්‌මාසම්‌බොධිමිච්‌ඡතා,
තයා මාරිස කිච්‌ඡෙන පූරිතා දසපාරමී; ()
සදෙවකස්‌ස ලොකස්‌ස හිතාය මාතුකුච්‌ඡියං,
උප්‌පජ්‌ජතූති යාචිංසු තංධීරං කරුණාපරං; ()
සතවස්‌සායුහෙට්‌ඨාපි උද්‌ධං සහසහස්‌සතො,
යස්‌මා අකාලො බුද්‌ධානං තස්‌මා කාලං විපස්‌සි සො; ()
යස්‌මා අඤ්‌ඤෙසු දීපෙසු සම්‌බුද්‌ධා නොපපජ්‌ජරෙ,
ජායන්‌ති ජම්‌බුදීපස්‌මිං තස්‌මා දීපං විපස්‌සි සො; ()
යස්‌මා මිලක්‌ඛදෙසෙසු නූප්‌පජ්‌ජන්‌ති තථාගතා,
ජායරෙ මජ්‌ඣිමෙ දෙසෙ තස්‌මාදෙසං විපස්‌සි සො; ()
යස්‌මා නජායරෙ වෙස්‌සසුද්‌දත්‌වයෙසු ජායරෙ,
ඛන්‌තියෙ බ්‍රාහ්‌මණෙ බුද්‌ධා කුලං තස්‌මා විපස්‌සි සො; ()
යස්‌මා අනඤ්‌ඤවිසයා කුච්‌ඡි සම්‌බුද්‌ධමාතුයා,
තස්‌මා ආයුපරිච්‌ඡෙදවසෙන පස්‌සි මාතරං; ()
ලොකෙකලොචනො එවං කත්‌වා පඤ්‌චාවලොකනං,
තාසං පටිඤ්‌ඤං පාදාසි කරුණාපුණ්‌ණමානසො; ()
තප්‌පාදතාමරසචුම්‌බිත මොළිමාලා
සම්‌පත්‌තදෙවපරිසා’න්‌තරධායි තාව,
ඔගය්‌හ නන්‌දනවනං තුසිතාධිරාජා
තම්‌හා චවී මතිදයාදයිනාසභායො; ()
ඉති මෙධානන්‌දාභිධානෙනයතිනා විරචිතෙ සකලකවිජන හදයානන්‌දදානතිදානෙ ජිනවංසදීපෙ දුරෙනිදානෙ වෙස්‌සන්‌තරචරියප්‌පභුතිදෙවාරාධනා පවත්‌ති පරිදීපො පඤ්‌චමො සග්‌ගො.
ජිනවංසදීපෙ දූරෙනිදාන භාගො පඨමො.
යා සත්‌තසාරපභවා සිරිජම්‌බුදීපෙ
ඵීතා’මරාවතිපුරී’ව පුරීවතංසා,
ආදිච්‌චවංසිකනරින්‌දපවෙණි භූමි
ලක්‌ඛ්‍යාලයා කපිලවත්‌ථුපුරී පුරෙ’සි; ()
වණ්‌ණෙහි කණ්‌ණසුඛසද්‌දරසෙහි ජාත-
රූපෙහි අත්‌ථවිසරෙහි යතීහි යුත්‌තා,
යා රාජධානි පුථුපාණගණප්‌පදෙහි
ආසී (වසන්‌තතිලකා) රචනා යථෙව; () (සිලෙස බන්‌ධනං;)
පාචීදිසාභුජලතාය මහීයුවත්‍යා
සන්‌නද්‌ධසඞ්‌ඛවලයස්‌සිරිමාවහන්‌තං,
යස්‌සා සුධාසුපරිකම්‌මකතං රරාජ
පාකාරචක්‌කමචලං මකුටානුකාරං; ()
යස්‌සා රරාජ පරිඛා නගරින්‌දිරාය
කිඤ්‌ජක්‌ඛිඤ්‌ජරිතතීරදසාභිරාමා,
සංසිබ්‌බිතාලිවිත්‌තීමණිතන්‌තුපන්‌තී
පාකාරසොණිභරතො ගලිතම්‌බරං’ව; ()
කන්‌දප්‌පදප්‌පමදිරාමදමත්‌තධුත්‌තා
මන්‌දානිලෙරිතසුනීලලතාවිතානං,
යස්‌මිං විලොලනයනඤ්‌ජලිපියමානං
ආපානභුමිනිභමොපවනංභජිංසු; ()
මත්‌තඞ්‌ගනාය නවයොබ්‌බනගබ්‌බිතාය
රඞ්‌ගාලයග්‌ගමණිදප්‌පණබිම්‌බිතෙහි,
යා රාජධානි ඝනපීනපයොධරෙහි
සොම්‌මානනෙහි භජි මානසවාපිසොභං; ()
සඞ්‌කප්‌පිතාභරණරංසි සතෙරතාලී
දාඨාබලාකවිසරා මදවුට්‌ඨිධාරා,
යස්‌මිං පුරෙ ඝරමයූරකුලං අකාලෙ
කීළාපයිංසු වරවාරණවාරිවාහා; ()
පාකාරචක්‌කබහිනිග්‌ගත මුග්‌ගරාගං
යස්‌මිං තුරඞ්‌ගනිකරුද්‌ධටධූලිජාලං,
රච්‌ඡාවතාරජනතාය ඛණං ජනෙසි
භීතිං පදිත්‌තපලයානලජාලසොභං; ()
යස්‌මිං විමානමණිසිඞ්‌ගජුතිප්‌පබන්‌ධ-
සඤ්‌චුම්‌බිතං ජිතරවිං හරිණ්‌ඩකබිම්‌බං,
නාරීජනානනසරොජකතාවමානං
කොධාභිභුතමිව වණ්‌ණවිකාරමාප; ()
යත්‌ථිස්‌සරෙහි සමධිග්‌ගහිතානි තුඞ්‌ග-
කෙලාසකුටධවලාති මනොහරාති,
නිච්‌චං සුධාසුපරිකම්‌මකතානි චා’සුං
ලක්‌ඛීනිකෙතනනිභානි නිකෙතනානි; ()
යත්‌ථින්‌දනිලමණිමාපිතමණ්‌ඩපග්‌ගෙ
හෙමද්‌ධජාවලිපරිබ්‌භමණංක පුරම්‌හි,
ජීමූතකූටපමුඛෙ සතවිජ්‌ජුමාලා-
ලීලාවහං විරහිනීනමඝං ජනෙසි; ()
සඤ්‌ඣානුරාගමණිතොරණදීධිතීහි
භින්‌නන්‌ධකාරනිකරා’ඛිලනාගරානං,
යා රාජධානි ජනයන්‌තිපි තුඞ්‌ගතුට්‌ඨිං
පීත්‍යා නවාසි රජනීස්‌ම භිසාරිකානං; ()
සෙවාලකෙසරසමාකුලතීරභාගා
සම්‌ඵුල්‌ලරත්‌තපදුමුප්‌පලකල්‌ලහාරා,
හංසාලිසාරසසමොසරණාභිරාමා
යස්‌මිං සුනිම්‌මලජලා කමලාකරාසුං; ()
යස්‌මිංපුරෙ කුලවධූවදනම්‌බුජානං
ලද්‌ධුං නිරූපමසිරිං භුසමුස්‌සහන්‌තා,
යාවජ්‌ජ සෙතසරසිරුහසීතරංසී
අඤ්‌ඤොඤ්‌ඤබද්‌ධපටිඝා’ව වජන්‌ති නාසං; ()
යස්‌මිං සුවණ්‌ණමකණිරූපියවංසවණ්‌ණ-
මුත්‌තාපවාළචජිරෙහි මහාරහෙහි,
නානාපණා සුඛුමකාසිකසාණහඞ්‌ග-
කොසෙය්‍යඛොමවසනෙහි’භවුං පපුණ්‌ණා; ()
චක්‌කාසිසත්‌තිධනුකුන්‌තගදාදිභත්‌ථා
සන්‌නද්‌ධහෙමකවචා විජිතාරිවග්‌ගා,
සඞ්‌ගාමසාගරසමුත්‌තරණාතිසුරා
යොධා යහිං පුරවරෙ අකරිංසු රක්‌ඛං; ()
ඵූට්‌ඨා ක වාටනිකටෙ මණිමන්‌දිරානං
කප්‌පාසපට්‌ටධවලා සරදබ්‌භරාජී,
යස්‌මිං ඛණං ජවනිකාසිරිමාදධානා
ථීනං ජුගොප මධුපෙහි මුඛම්‌බුජානි; ()
නිබ්‌බිද්‌ධවීථිවිසරෙහි සුසජ්‌ජිතෙහි
නිච්‌චුස්‌සවාය පුරමුස්‌සිතතොරසෙහි,
භොගින්‌දභොගනිකරෙහි රසාතලං’ව
යං සම්‌පසාරිතඵණෙහි බභුව රම්‌මං; ()
යස්‌මිංපුරෙ විවටමන්‌දිරජාලකානං
උද්‌ධූතධුලිමලිනීකළිතාලකානං,
නාරිනමින්‌දුරුචීරානන දප්‌පණෙසු
ලොකස්‌ස ලොචනමණි පටිබිම්‌බිතා’සුං; ()
ගම්‌භීරසඞ්‌ඛපටභද්‌ධනිභූරිඝොසං
කෙලාසකූටධවලාලයඵෙණපිණ්‌ඩං,
යං පුණ්‌ණසත්‌තරතනං පුරඛීරසින්‌ධුං
ලක්‌ඛී අලඞ්‌කරි තුරඞ්‌ගතරඞ්‌ගවෙගං; ()
රෙණුප්‌පබන්‌ධමලිනං කවනරාජිනීලං
මධවාතිමත්‌තමධුපං පදුමාභිරාමං,
යං රාජහංසභජිතං අවතිණ්‌ණලොකං
ආසි පුරං විකචකඤ්‌ජවනං යථෙව; () (සිලෙසබන්‌ධනං;)
යස්‌මිංපුරම්‌හි රතනුජ්‌ජලනීලකණ්‌ඨා
රාගාවමද්‌දිතධරා’විවටද්‌විජාලි,
ආසුංපයොධරභරා’විරළප්‌පදෙසා
සම්‌පත්‌තවුට්‌ඨිදිවසාවියමාතුගාමා; () (සිලෙසබන්‌ධනං;)
ධම්‌මානුධම්‌මපටිපත්‌ති පරායණස්‌ස
සංසාරභීරුකජනස්‌ස තපොවනාභා,
යා රාජධානි පචුරන්‌ධපුථුජ්‌ජනානං
ආපානභුමිව බභූවු’භයප්‌පකාරා; ()
බුද්‌ධඞ්‌කුරස්‌ස රවිවංසපභඞ්‌කරස්‌ස
සම්‌මා සුඛානුභාවනාය සුභුමිභුතා,
භො යාදිසි කපිලවත්‌ථුපුරි පුරෙ’සි
ධම්‌මස්‌සභාවමධුනා පරිදීපයෙ සා; ()
තස්‌මිං බභූව නගරෙ නගරාධිරාජෙ
රාජා සුනීතිචතුරො චතුසඞක්‌ගහෙහි,
ධම්‌මෙන සබ්‌බජනරඤ්‌ජනකො කදාචි
සුද්‌ධොදනව්‌හවිසුතො රවිවංසකෙතු; ()
දිස්‌වා’වතාරකලුසිකතමත්‌තභාවං
උක්‌කණ්‌ඨිතෙ’ව කමලා කමලාපතිස්‌ස,
භූපාලිපාලිභජිතං චරණාරවින්‌දං
සංසෙවි යස්‌ස රවිවංසධජස්‌ස රඤ්‌ඤො; ()
යස්‌සා’වනීසකවිනො කවිකණ්‌ඨභුසා
වාණිවධූ මධුරකොමකලකත්‌තවාණී,
පත්‌වා චතුම්‌මුඛමුඛම්‌බුජකානනම්‌හා
හංසීව මානසතළාකමලඞ්‌කරිත්‌ථ; ()
සබ්‌බාරිදප්‌පමථනොපරි එකධත්‌වා
අජ්‌ඣත්‌තිකාරිපරාජියමප්‌පසය්‌හං,
සංසුද්‌ධචිත්‌තනිකසෙ නිසිතෙන තාව
පඤ්‌ඤායුධෙන අවධිත්‌ථ මහීභුජො යො; ()
යස්‌මා මහීපතිමහීධරතො උපෙක්‌ඛා-
වෙළාතලාවධි දයාසලිලෙන පුණ්‌ණා,
මෙත්‌තාසවන්‌ති පභවා මුදිතුමිමාලා
අජ්‌ඣොත්‌ථරිත්‌ථ භුවනත්‌තයගංජනොඝං; ()
සම්‌පන්‌නදානසදනම්‌බුධරෙහි යස්‌ස
දානාධිමුත්‌තිපරමස්‌ස මනොදහෙසු,
තණ්‌හාතටානි කපණද්‌ධිකයාචකානං
හින්‌නානි සත්‌තරතනම්‌බුනිපාතනෙන; ()
යස්‌සින්‌දනීලනයනං රජතාවදාත-
දන්‌තං සුවණ්‌ණවදනඤ්‌ච පවාළසීසං,
මුත්‌තාමයඞ්‌ගවයවං රතනෙහි නානා
දෙහං සුමාපිතමිවාසි පිතාමහෙන; () (සීලෙසබන්‌ධනං)
යස්‌සාතිපණ්‌ඩරයසොවිසරො’සධීසො
සඞෙක්‌කාචිතානනසරො’රිනරාධිපානං,
සොකන්‌ධකාරභිදුරො රිපුරාජිනීනං
ආසාගරන්‌තපථවිං පරිධිකරිත්‌ථ; ()
රාජඤ්‌ඤඡප්‌පදකුලං සකලං පදෙස-
රජ්‌ජාධිපච්‌චමකරන්‌දරසාභිලාසං,
යස්‌සත්‌තභාවකමලාකරඵුල්‌ලිතානි
සංසෙවි චාරුචරණම්‌බූරුහානි භත්‍යා; ()
සෙතාතපත්‌තමිව විස්‌සුතකිත්‌තිපුඤ්‌ජං
කත්‌වා’සිපත්‌තමිව පාවකභීමතෙජං,
යස්‌මිං සරජ්‌ජමනුසාසති සෙසභූපා
ඡත්‌තාසිභූසිතකරා සකකිඞ්‌කරා’ව; ()
ද්‌වාරානි’නෙකකපණ්‌ඩිකයාචකානං
උග්‌ඝාටිතොප්‍ය’විරතං රතනාලයෙසු,
සද්‌ධාදිසත්‌තධනරක්‌ඛණතප්‌පරො සං
ද්‌වාරත්‌තයං පිදහි යො කපිලාධිනාථො; ()
යස්‌සුස්‌සිතද්‌ධනුඑණො පබලාරිවග්‌ගං
විස්‌සට්‌ඨාබාණවිසරබ්‌බිසමුබ්‌බහන්‌තො,
භස්‌මිකරි කරිකරායතපීනබාහු-
සප්‌පො සුඵොඨිතජියාපරිඵන්‌දජිව්‌හො; ()
ලක්‌ඛීනිධානනගරණ්‌ණවපාතුභූතො
මන්‌තින්‌දකූටසිඛරීවලයාවුතො යො,
වාලග්‌ගමත්‌තම්‌පි රාජසිණෙරුරාජා
කොධානිලෙන රිපුරඤ්‌ඤමකම්‌පියො’සි; ()
භස්‌මිකතාඛීලවිපක්‌ඛනරින්‌දකට්‌ඨො
කොධානලො සරසමීරණභාවිතොපි,
නිබ්‌බායි පඝ්‌ගරිතබප්‌පජලෙහි යස්‌ස
ලොලබ්‌බිලොචනඝටෙහි විපක්‌ඛථීනං; ()
සන්‌නීතිමග්‌ගජලිතුග්‌ගමතිප්‌පදීපො
කිත්‌තිප්‌පබන්‌ධධවලීකතජිවලොකො,
රාජින්‌දමොළිමණිලඞ්‌කතපාදපීඨො
ධම්‌මෙන රජ්‌ජමනුසාසි චිරං සරාජා; ()
තස්‌සතිපීවරපයොධරභද්‌දකුම්‌භ-
ද්‌වන්‌දාතිභාරවිරළීකතමජ්‌ඣභාගා,
නිද්‌දොසබාලරවිමණ්‌ඩලචාරුගණ්‌ඩා
දිබ්‌බච්‌ඡරාජිතවිරාජිතරූපසොභා; ()
සම්‌ඵුල්‌ලනීලකමලාමලනීලනෙත්‌තා
ඔලම්‌බමානමණිකුණ්‌ඩලලම්‌බකණ්‌ණා,
මුත්‌තාවලිවදසනාවලි හංසධෙනු-
හෙලාපහාසගමනා මුදුචාරුවාණී; ()
බිම්‌බාධරා ජලධරායතකෙසපාසා
සොවණ්‌ණදප්‌පණනිභානනචන්‌දබිම්‌බා,
සන්‌නීරපුප්‌ඵමකුළොපමචාරුජඞ්‌ඝා
කන්‌දප්‌ප මඞ්‌ගලසිලාතලසොණිභාගා; ()
නාභාලවාළරුහනීලතමාලවල්‌ලී-
ලීලාවිනද්‌ධනවකොමලරොමරාජී,
ලාවණ්‌ණවාරිධිතරඞ්‌ගභුජා’භිනීල-
සුබ්‌භුලතාමකරකෙතනචාපරූපා; ()
භුපාලවංසකමලාකරරාජභංසි
මායාවධු ඉව සුජම්‌පතිනො සුජාතා,
චන්‌දස්‌සකොමුදි’ව විජ්‌ජුරිව’ම්‌බුදස්‌ස
රඤ්‌ඤො’තිචාරුචරිතාසි පියා මහෙසි; ()
තස්‌මිං නගොපමඝරෙ නගරෙ තදාසි
ආසාළ්‌හිමඞ්‌ගලමහො දිවසානිසත්‌ත,
මිලාසුගන්‌ධපරමං විගතාසවං තං
නක්‌ඛත්‌තකීළමකරිත්‌ථ මහෙසි මායා; ()
වුට්‌ඨාය සත්‌තමදිනාගතපුණ්‌ණමාය
පාතො සුගන්‌ධපරිවාසිතවාරිනා සා,
කත්‌වා සිනානමතුලං කපණ්‌ඩිකානං
දානං අදාසි චතුලක්‌ඛධනබ්‌බයෙන; ()
වත්‌ථාහතෙහි සුනිවත්‌ථසුපාරුතා සා
භුත්‌වා’ග්‌ගභොජනමධිට්‌ඨිතුපොසථ’ඞ්‌ගා,
නිද්‌දාතුරා සුපිනමොවරකං පවිස්‌ස
කල්‍යාණමද්‌දස සිරීසයනෙ නිපන්‌නා; ()
නෙත්‌වා නිපන්‌නසයනං හිමවන්‌තපස්‌සෙ
හෙට්‌ඨා විසාලතරසාළමහීරුහස්‌ස,
නං සට්‌ඨියොජනකචාරුමනොසිලායං
ආරොපයිංසු චතුරො කිර දෙවරාජා; ()
නෙත්‌වා මනුස්‌සමලසංහරණාය තම්‌හා’
නොතත්‌තනාමරහදං සුනහාපයිත්‌වා,
දෙවිත්‌ථියො සපදි දිබ්‌බමයෙහි නෙසං
වත්‌ථෙහි ගන්‌ධකුසුමෙහි අලඞ්‌කරිත්‌වා; ()
තත්‌ථුබ්‌භවො ලසති රූපියපකබ්‌බතො යො
තස්‌සොදරෙ’තිරුචිරෙ කනකබ්‌බිමානෙ,
පාචීනසීසවති දිබ්‌බමයම්‌හි සම්‌මා
පඤ්‌ඤාපිතග්‌ගසයනම්‌හි සයාපයිංසු; ()
ඔරුය්‌හ සෙතවරවාරණරාජවෙසො
බුද්‌ධඞ්‌කුරො රුචිරකඤ්‌චනපබ්‌බතම්‌හා,
ආරුය්‌හ සජ්‌ඣුධරණිධරමුත්‌තරාය
සොණ්‌ඩාය සෙතසරසිරුහමුබ්‌බහන්‌තො; ()
පත්‌වා විමානවථකුඤ්‌චනදං නදිත්‌වා
කත්‌වා පදක්‌ඛිණමලඞ්‌කතමාතුසෙය්‍යං,
භෙත්‌වාන තායපන දක්‌ඛිණපස්‌සමන්‌තො
කුච්‌ඡිං පවිට්‌ඨසදිසො සුපිනෙන දිට්‌ඨො; ()
මායාය රාජවධුයා රුචිරානනාය
ආසාළ්‌හිපුණ්‌ණමියමුත්‌තර’සාළ්‌හභෙන,
බුද්‌ධඞක්‌කුරස්‌ස පඨමෙන මහාවිපාක-
චිත්‌තෙන සම්‌පති අහූ පටිසන්‌ධිගබ්‌භෙ; ()
බුද්‌ධඞ්‌කුරස්‌ස පටිසන්‌ධිගතස්‌ස ගබ්‌භෙ
මායාය චාරුචරිතාය ච ඛග්‌ගහත්‌ථා,
නිස්‌සෙසුපද්‌දවනිරාකරණාය රක්‌ඛං
ගණ්‌හිංසු තාව චතුරො සුරරාජපුත්‌තා; ()
මායාය භත්‌තුපරමාය තතොප්‌පභුති
නූප්‌පජ්‌ජි කිඤ්‌චි පුරිසෙසු සරාගචිත්‌තං,
සා පඤ්‌චකාමසුඛිනී අකිලන්‌තකායා
ලාභෙනුළාරයසසාප්‍යභිවඩ්‌ඪිතාසි; ()
පඤ්‌ඤායි ධොතරතනෙ ජනිකාය අන්‌තො
කුච්‌ඡිං ගතො යථරිවාවුතපණ්‌ඩුසුත්‌තං,
තං කුච්‌ඡිනා පරිහරී දසමාසමත්‌තං
පත්‌තෙන තෙලමිව රාජිනි අප්‌පමත්‌තා; ()
පාතො’ව පාටිපදගෙ දිවසෙ පබුද්‌ධා
රඤ්‌ඤො කථෙසි සුපිනං අථ සො නරින්‌දො,
වෙදඞ්‌ගවෙදචතුරෙ චතුසට්‌ඨමත්‌තෙ
පක්‌කොසයී ද්‌විජවරෙ ද්‌විජවංසකෙතූ; ()
ලාජුත්‌තරාය පරිභණ්‌ඩකතාය භුම්‍යා
පඤ්‌ඤාපිතෙසු සුඛුමත්‌ථරණත්‌ථතෙසු,
භද්‌දාසනෙසු භවනම්‌හිනිසින්‌නකානං
නෙමිත්‌තිකානමවනීපති භුසුරානං; ()
පක්‌ඛිත්‌තසප්‌පිමධුසක්‌ඛිරඛීරමිස්‌ස-
පායාසපුණ්‌ණහරිරූපියභාජනෙහි,
වත්‌ථාහතානි ධනධඤ්‌ඤචයඤ්‌ච ධෙනූ
දත්‌වාන දිට්‌ඨසුපිනස්‌ස ඵඛලං අපුච්‌ඡි; ()
මාචින්‌තයිත්‌ථ තව රාජිනියා ජනින්‌ද
කුච්‌ඡිම්‌හි තම්‌පති පතිට්‌ඨහි පුත්‌තගබ්‌භො,
අජ්‌ඣාවසිස්‌සති සඤ්‌චෙපන චක්‌කවත්‌ති
රාජා භවිස්‌සති අගාරමසංසයං සො; ()
හිත්‌වා සසත්‌තරතනං චතුදීපරජ්‌ජං
සො පබ්‌බජිස්‌සති සචෙ භවනා’භිගන්‌ත්‌වා,
බුද්‌ධො භවිස්‌සති ධුවං චතුසච්‌චබුද්‌ධො
ඉච්‌චබ්‍රුවිංසු සුපිනත්‌ථවිදූ විදූ තෙ; ()
සා ගබ්‌භභාරවඨරිකතමජ්‌ඣභාගා
ගන්‌තුං සකං කුලඝරං කුලකඤ්‌ජහංසි,
ඉච්‌ඡාමහන්‌ති පටිවෙදයි දෙවි රඤ්‌ඤො
සො සම්‌පටිච්‌ඡි වචනං කරවීකවාණ්‍යා; ()
තම්‌හා මහානගරතො නගරඞ්‌ගපුණ්‌ණං
සො යාව දෙවදහනාමිකරාජධානී,
මුත්‌තා’වදාතපුළිනත්‌ථරණෙහි රාජා
ලාජොපහාරවිධිනා කමලුප්‌පලෙහි; ()
සන්‌තීරපුප්‌ඵකලසෙහි සමප්‌පිතෙහි
මන්‌දාතිලෙරිතපටාක ධජාවලීහි,
කාරාපයී කනකරූපියතොරණෙහි
අද්‌ධානමග්‌ගසමලඞ්‌කරණං’තඛිප්‌පං; ()
වන්‌දී’භිගීතථුතිමඞක්‌ගලගීතිකාහි
පඤ්‌චඞ්‌ගිකෙහි තුරියෙහි කතුපහාරං,
තස්‌මිං සුමණ්‌ඩිතපසාධිතමඤ්‌ජසම්‌හි
දිබ්‌බව්‌චරාසිරිවිඩම්‌බනරූපසොභං; ()
දෙවිං සුවණ්‌ණසිවිකාය සුසජ්‌ජිතාය
ආරොපයිත්‌ව ඛචිතාය මණීහි නානා,
පෙසෙසි භුපති පුරක්‌ඛතඤාතිසඞ්‌ඝං
සද්‌ධිං සහස්‌සසචිවෙහි සුඛෙධිතං සො; ()
සම්‌ථුල්‌ලපුප්‌ඵඵලපල්‌ලවවත්‌තභාර-
රුක්‌ඛාකුලං ඝනසුනීලලතාවිතානං,
හින්‌තාලතාලනළකීචකනාළිකෙර-
සන්‌නීරපූගතිණපාදපපන්‌තිසාලිං; ()
සෙවාලනීලසලිලානිලසීතලෙහි
ඔතිණ්‌ණකහංසවිසරෙහි සමුල්‌ලසත්‌තං,
ඣඞ්‌කාරරාවමුඛරාලිකුලාකරාල-
කිඤ්‌ජක්‌ඛජාලභරිතම්‌බුරුහාකරෙහි; ()
පුප්‌ඵාභිගන්‌ධසුරභීකතගන්‌ධවාහං
අද්‌දක්‌ඛිසබ්‌බජනලොචනපීයමානං,
නින්‌දන්‌තනන්‌දනවනං වනජායතක්‌ඛී
සා ලුම්‌බිනීවනමනඞ්‌ගවිමානභූතිං; ()
සා රාජිනී නවදලඞ්‌ගුලිපන්‌තීචාරු-
සාඛාභුජොපහිතමඤ්‌ජරිචාමරෙහි,
සන්‌නද්‌ධකොමලලතාවනිතානමග්‌ගෙ
අත්‌තුපහාරකරණාය කතාවකාසා; ()
සෙනාය චාරුචරණම්‌බුරුහොද්‌ධටෙහි
රෙණූහි ධූසරිතමග්‌ගමනක්‌කමන්‌ති,
සද්‌ධිං සකාය පරිසාය තතොතරිත්‌වා
තං ලුම්‌බිනීවනමුපාවිසි රාමණෙය්‍යං;()
තං රාජිනිං වනවධු ජිතහංසගාමිං
ආමොදමන්‌දමලයානිලහත්‌ථගෙහි,
සම්‌භාවයිත්‌ථ මුඛරාලිකුලාභිකිණ්‌ණ-
රෙණුප්‌පබන්‌ධහරිසඞ්‌ඛසතෙහි මග්‌ගෙ; ()
ගච්‌ඡන්‌තියා චරණනූපුරනාදපාස-
බද්‌ධානමුන්‌නතසිරොමිගපොතකානං,
උම්‌මීලිතායතවිලොචනපන්‌තිපක්‌ඛෙ
දස්‌සෙසි නීලනලිනීවනරාජිසොභං; ()
උද්‌ධං සමග්‌ගසිඛරෙහි කතාවකාස-
මග්‌ගන්‌තරෙහි කලිකාකුසුමාකුලෙහි,
නානාලතාකුලමහිරුහතොරණෙහි
උය්‍යානභුමි උපහාරරතෙ’ව භුය; ()
උක්‌ඛිත්‌තපිඤ්‌ඡභරමන්‌තසිඛණ්‌ඩිමාලා-
කීළාහි කොකිලකුලඞනිකාහළෙහි,
උය්‍යානභුමි මකරඞජරඞ්‌ගභුමි-
ලීලං භජිත්‌ථ භමරද්‌ධනිවල්‌ලකීහි; ()
නිච්‌චං වසන්‌තසමයස්‌සිරිමුබ්‌බහන්‌තං
තංඛොවනං වනවධූහදයානුතාපී,
පත්‌තො නිදාඝසමයොපි ජනෙසි තුට්‌ඨිං
තස්‌සා සිරිසකුසුමාලිකුලාවතංසො; ()
තස්‌මිං නිදාඝසූරියාතපතාපිතාම්‌භං
රිත්‌තාලවාළමිවකාලමකාලමෙඝො,
චින්‌තාතුරං හදයමත්‌තසඛීජනොපි
පීණෙසි ගබ්‌භපරිපාකභරං වාහන්‌ත්‍යා; ()
කට්‌ඨාවසිට්‌ඨතරවො පරිහීනපත්‌තා
තස්‌සාධරක්‌ඛිදසනජ්‌ජුතිසඞ්‌ගමෙන,
ආසුං නවඞ්‌කුරපලාසවිකාසපුප්‌ඵ-
සංවෙල්‌ලිතා’ව රමණීයවනප්‌ප දෙසෙ; ()
ගිම්‌හාභීතාපපරිපීළිතඞ්‌ධල්‌ලිකානං
ගම්‌භීරරාවමුඛරීකතදායරාජි,
දුක්‌ඛාතුරබ්‌බිරහිනීපමදාජනස්‌ස
ආසි විලාපබධිරීකළිතෙ’ව සාළා; ()
තස්‌මිං විකාසකලිකාවලිහාරිහාරා
කිඤ්‌චාපි පක්‌කඵඛලවල්‌ලරිකණ්‌ඨභුසා,
නාසක්‌ඛි පූගතරුපන්‌ති සුමණ්‌ඩිතාය
මායාය තාය සිරිමාභරිතුං ඝටන්‌තී; ()
උය්‍යානමුබ්‌භමිතමත්‌තමධුබ්‌බතෙහි
චම්‌පෙය්‍යපුප්‌ඵමකුලෙහි සමාකුලංතං,
උද්‌ධුතධුමපටලෙහි මනොභවස්‌ස
දීපෙහි වාසභවකනං’ව ලසන්‌තමාසි; ()
ගබ්‌භූපගං භමරකෙසකලාපභාරා
බුද්‌ධඞ්‌කුරං පරිණතඞ්‌කුරලොමහංසා,
වන්‌දන්‌තියො විය තහිං ථබකඤ්‌ජලීහි
මන්‌දානිලෙරිතලතාවනිතා කනතා’සුං; ()
ගබ්‌භූපගස්‌ස පරිපක්‌කඵලෙහි නානා
පුඤ්‌ඤානුභාවපභවොතුසමුබ්‌භවෙහි,
මායාය ගබ්‌භබලිකම්‌මනි තප්‌පරෙ’ව
උය්‍යානභුමි ජනතං භවි තප්‌පයන්‌ති; ()
ගබ්‌භූපගස්‌ස හි මහාපුරිසස්‌ස ගබ්‌භ-
වුට්‌ඨානමඞක්‌ගලමහුස්‌සවවාසරම්‌හි,
උය්‍යානභුමි සකලොතුසමුබ්‌භවෙහි
ආසි විකාසකුසුමෙහි සමාභිකිණ්‌ණා; ()
සාලුම්‌බිනීවනසිරිං කලහංසඝොසං
සමඵුල්‌ලපුප්‌ඵසුරභිංඵලසම්‌භවොජං,
පඤ්‌චින්‌ද්‍රියෙහි ගිරිනිජ්‌ඣරසිතවාතං
පච්‌චක්‌ඛපඤ්‌චවිධකාමරසංඅවින්‌දි; ()
නිය්‍යාසසාරසුරහිංඵඛලපල්‌ලවෙහි
ඣංකාරිතාලිකුලකුජිතකොකිලෙහි,
සම්‌ඵුල්‌ලපුප්‌ඵනිකරෙහි සමාභිකිණ්‌ණ
මද්‌දක්‌ඛිසායුවතිමඞ්‌ගලසාළසාලං
සම්‌ඵුල්‌ලසාළකලිකංතයතාලිමාලා
සඤ්‌චුම්‌බිතංකුවලයාමලලොචනාය,
සාඛංසුකොමලකරඞ්‌ගුලිපල්‌ලවෙහි
මායාමහෙසිසමලඞ්‌කරි විතමායා; ()
භාරොනතා’ව රුචිරඞ්‌ගුලිපල්‌ලවානං
ඣඞ්‌කාරරාවමුඛරාලිකුලාභිරාමා,
සාඛා විකාසකුසුමෙහිසමාකුලා සා
ඔලම්‌බයට්‌ඨි භවි ගබ්‌භභරාතුරාය; ()
තස්‌සා චලිත්‌ථ පවනො චලලොචනාය
කම්‌මුබ්‌භවො වරතිරොකරණෙහි තාව,
දෙවිං නිරූපමසිරිං සුපරික්‌ඛිපිත්‌වා
තම්‌හා පටික්‌කමි ජනො කළිතාවකාසො; ()
බ්‍රහ්‌මාමරාසුරනරොරගපූජනීයං
බත්‌තිංසලක්‌ඛණසමුජ්‌ජලරූප සාරං
නිද්‌ධොතජාතිමණිසන්‌නිභසුද්‌ධගත්‌තං
සත්‌තුත්‌තමං සපදි දෙවි ඨිතා විජායි; ()
දුග්‌ගන්‌ධමුත්‌තමලසොණිතමක්‌ඛිතඞ්‌ගා
ජායන්‌ත්‍ය’සෙසමනුජා මනුජෙසුනෙ’වං,
චඞ්‌ගොටකම්‌හි ජිනධාතුරිවාධිවාසො
ථූපම්‌හි සොණ්‌ණපටිමාරිව මාතුගබ්‌භං; ()
නිස්‌සෙණිතොව පුරිසො රතනාසනම්‌හා
ථෙරොව ධම්‌මකථිකො ඨිතකො’තරන්‌තො,
සම්‌මා පසාරිය උභො මුදුපාණිපාදෙ
සො නික්‌ඛමිත්‌ථ කුණපෙහි අමක්‌ඛිතඞ්‌ගො; ()
තත්‍රොපගම්‌ම චතුරො චතුරානනා තං
ජාලෙන කඤ්‌චනමයෙන විසුද්‌ධචිත්‌තා,
ආදාය මාතුපුරතො තනයං ඨපෙත්‌වා
චන්‌දානනෙ භවතු නන්‌දමනා’ත්‍ය’වොචුං; ()
ආදිච්‌චවංසකමලාකරභාකරස්‌ස
බුද්‌ධඞ්‌කුරස්‌ස සුභසීතලවාරිධාරා,
නික්‌ඛම්‌ම තාව නභසා නිජමාතුයා ච
ගාහාපයුං උතුමුභොසු කලෙබරෙසු; ()
තෙසං කරෙහි චතුරො සුරරාජපුත්‌තා
ගණ්‌හිංසු සණ්‌හසුඛුමාය’ජිණප්‌පවෙණ්‍යා,
තෙසඤ්‌හි පාණිතලතො පණිපාතපුබ්‌බං
ගණ්‌හිංසු තං දුකුලචුම්‌බටකෙන’මච්‌චා; ()
තෙසං කරෙහි පථවිතලමොතරිත්‌වා
ඨත්‌වා පුරත්‌ථිමදිසං අසමො විපස්‌සි,
උද්‌ධං අධො චතුදිසානුදිසා ච එවං
එකඞ්‌ගනං භවිතදා’ඛිලලොකධාතු; ()
තුම්‌හෙහි උත්‌තරිතරො භුවසෙ තීසු
නත්‌ථීති මත්‌ථකජටාමකුටප්‌පිතෙහි,
කත්‌වානිජඤ්‌ජලිපුටෙහි නිපච්‌චකාරං
බ්‍රහ්‌මාමරාසුරනරා තමභිත්‌ථවිංසු; ()
සොච’ත්‌තනා සමමදිස්‌ව දිසාසු තාසූ
තප්‌පාදවීතිහරණෙන පදානිසත්‌ත,
ගන්‌ත්‌වාන උත්‌තරදිසා’භිමුඛො අවන්‍යා
අබ්‌භුග්‌ගතම්‌බුරුහමුද්‌ධනි තිට්‌ඨමානො; ()
අග්‌ගො’හමස්‌මි අහමස්‌මි ජනස්‌ස ජෙට්‌ඨො
සෙට්‌ඨො’හමස්‌මි අයමන්‌තිම’ජාති මය්‌හං,
ධීරො මමෙතරහි නත්‌ථි පුනබ්‌භවො’ති
නිච්‌ඡාරිතාසභිවචො නදි සීහකනාදං; ()
වෙසාඛෙමාසෙ සුහකුජදිනෙ පුණ්‌ණමායං විසාඛෙ
නක්‌ඛත්‌තෙයොගෙ සුරගුරුගතෙ සො කුළීරව්‌හරාසිං,
සඤ්‌ජාතො නාථො පරමකරුණාභාවනාභාවතත්‌තො
මායාකුච්‌ඡිම්‌හා කුසුමිතලතාවෙලලිතුය්‍යානභුම්‍යා; ()
ඉති මෙධානන්‌දාභිධානෙන යතිනා විරචිතෙ සකල කවිජන හදයානන්‌දදානනිදානෙ ජිනවංසදීපෙ අවිදුරෙනිදානෙ පච්‌ඡිමභවික මහාබොධි සත්‌තුප්‌පත්‌ති පවත්‌තිපරිදීපො ඡට්‌ඨොසග්‌ගො.
No comments:
Post a Comment