නමො තස්‌ස භගවතො අරහතො සම්‌මාසම්‌බුද්‌ධස්‌ස
යස්‌සඤෙය්‍යෙසු ධම්‌මෙසු, නාණුමත්‌තම්‌පවෙදිතං,
නත්‌වාසද්‌ධම්‌මසඞ්‌ඝංතං, සද්‌දබින්‌දුංසමාරභෙ;
කාදිරිතා නවසඞ්‌ඛ්‍යා, කමෙනටා දි යාදිච,
පාදයොපඤ්‌ච සඞ්‌ඛ්‍යාතා, සුඤ්‌ඤනාමා සරඤ්‌ඤනා;
සරෙහෙවසරාපුබ්‌බෙ ලුත්‌තාවාවීපරෙරමා,
බ්‍යඤ්‌ජනාචාගමාවාවී දීඝරස්‌සාදිසම්‌භවා;
කාකාසෙනාගතොසිස කෙනිද්‌ධිමච්‌චදස්‌සයි,
අරාජඛ්‌වග්‌ගිමෙසීනං සොතුකම්‌මෙඝයිත්‌ථියො;
ඉති සන්‌ධිකප්‌පො සමත්‌තො.
බුද්‌ධපුමයුවසන්‌ත රාජබ්‍රහ්‌මසඛාචසා,
යතාදිදෙහීජන්‌තුච සත්‌ථුපිතාභිභූවිදූ;
කඤ්‌ඤාම්‌මාරත්‌තිථිපො, ක්‌ඛරණීනදිරුමාතුභූ,
නපුංසකෙතියන්‌තාච, පදකම්‌මදධායුනො;
ගහිතාගහණෙනෙත්‌ථ සුද්‌ධොස්‍යාද්‍යන්‌තකාපුමෙ,
විමලාහොන්‌තිජාන්‌තෙහි ථ්‍යංපඤ්‌චන්‌තෙහිදාධිකා;
නපුංසකෙපයොගාතු ජනකාහොන්‌තිත්‍යන්‌තතො,
පධානානුගතාසබ්‌බ නාමසමාසතද්‌ධිතා;
අත්‌තිලිඞ්‌ගානිපාතාදි තතොලුත්‌තාවස්‍යාදයො,
සුත්‌තානුරූපතොසිද්‌ධා හොන්‌තිවත්‌තාමනාදයො;
ඉති නාමකප්‌පො සමත්‌තො.
ඡකාරකෙසසාමිස්‌මිං සමාසොහොතිසම්‌භවා,
තද්‌ධීතාකත්‌තුකම්‌මස, ම්‌පදානොකාසසාමිසු;
සාධත්‌තයම්‌හිආඛ්‍යාතො කිතකොසත්‌තසාධනෙ,
සබ්‌බත්‌ථපඨමාවුත්‌තෙ අවුත්‌තෙදුතියාදයො;
මනසාමුනිනොවුත්‍යා වනෙබුද්‌ධෙනවණ්‌ණිතෙ,
වට්‌ටාහිතොවිවට්‌ටත්‌ථං භික්‌ඛුභාවෙතිභාවනං;
ඉති කාරකකප්‌පො සමත්‌තො.
රාසීද්‌විපදිකාද්‌වන්‌දා ලිඞ්‌ගෙනවචනෙනච,
ලුත්‌තාතුල්‍යාධිකරණා බහුබ්‌බීහීතුඛෙමරූ;
තප්‌පුරිසාචඛෙමොරා දයාචකම්‌මධාරයා,
දිගවොචාව්‍යයාහාරා එතෙසබ්‌බෙපිහාරිතා;
ඉති සමාසකප්‌පො සමත්‌තො.
කච්‌චාදිතොපිඑකම්‌හා සද්‌දතොනියමංවිනා,
නෙකත්‌ථෙසතිභොන්‌තෙව සබ්‌බෙතද්‌ධිතපච්‌චයා;
ඉති තද්‌ධිතකප්‌පො සමත්‌තො.
කත්‌තරිනාඤ්‌ඤථාකම්‌මෙ තථාභාවෙතුමෙරයා,
සබ්‌බෙතෙපචධාතුම්‌හි සඞ්‌ඛෙපෙනමරූමයා;
ගමීම්‌හාතිගුණාඵත්‌තො සම්‌භවාඅඤ්‌ඤධාතුසු,
අනන්‌තාවපයොගාතෙ ආදෙසපච්‌චයාදිහි;
ඉති ආඛ්‍යාතකප්‌පො සමත්‌තො.
කිතාදිපච්‌චයාසබ්‌බෙ, එකම්‌හාඅපිධාතුතො,
සියුංනුරූපතොසත්‌ත, සාධනෙසතිපායතො;
ඉති කිතකප්‌පො සමත්‌තො.
ඉමිනාකිඤ්‌චිලෙසෙන, සක්‌කාඤාතුංජිනාගමෙ,
පයොගාඤාණිනාසින්‌ධු, රසොවෙකෙනබින්‌දුනා;
රම්‌මංසීඝප්‌පවෙසාය, පුරංපිටකසඤ්‌ඤිතං,
මග්‌ගොජුමග්‌ගතංමග්‌ගං, සද්‌දාරඤ්‌ඤෙවිසොධිතො;
තෙනෙව කිඤ්‌චි ජලිතො ජලිතො පදීපො
කච්‌චායනුත්‌තිරතනො චිතගබ්‌භකොණෙ,
ධම්‌මාදිරාජගුරුනා ගරුමාමකෙන
ධම්‌මෙන යොබ්‌බිපතිනා සගරුත්‌තනීතො;
ඉති සද්‌දබින්‌දු පකරණං පරිසමත්‌තං.
යොසඤ්‌ඤමො ගුණධනො නයනං නිජංව
සික්‌ඛාපයී මම මවං සුගතාගමාදො,
සල්‌ලොක පුඤ්‌ජ සුහදො පදුමාදි රාම
නාමො මහා යතිවරා චරියො සමය්‌හං;
සද්‌ධාධනෙන වසතා විදිතම්‌හි පුප්‌ඵා
රාමෙධුනා අරියවංස ධජව්‌හයෙන,
සන්‌තෙන ඤාණතිලකො ත්‍යපරාඛ්‍යකෙන
බාලානමෙතමවිධීයි මයාහිතාය;
No comments:
Post a Comment